തിരുവനന്തപുരം. സംസ്ഥാനത്തെ അഴിമതിയുടെ കാര്യത്തില്‍ ഒന്നാമത് എത്തിക്കുവനാണ് മുഖ്യമന്ത്രി പിണറായി വിജയന്‍ ശ്രമിക്കുന്നതെന്ന് കെ മുരളീധരന്‍. മുഖ്യമന്ത്രി ജനങ്ങളെ വെല്ലുവിളിക്കുകയാണ്. കേരളത്തിലെ ജനങ്ങള്‍ ഇത് മനസ്സിലാക്കും. എന്തെല്ലാം ആരോപണം ഉണ്ടായാലും പദ്ധതികള്‍ നടപ്പാക്കുമെന്നാണ് മുഖ്യമന്ത്രിയുടെ ധാര്‍ഷ്ട്യമെന്നും അദ്ദേഹം പറഞ്ഞു.
എഐ ക്യാമറ വിവാദത്തില്‍ അന്വേഷണം പാതിവഴിയില്‍ മുടങ്ങി. അതേസമയം വിശദമായ വിവരങ്ങള്‍ ആവശ്യമുള്ളതിനാലാണ് അന്വേഷണം വൈകുന്നതെന്നാണ് വ്യവസായ വകുപ്പ് പറയുന്നത്. എഐ ക്യാമറ വിവാദത്തില്‍ വകുപ്പ് തല അന്വേഷണം പ്രഖ്യാപിച്ചു ആഴ്ചകള്‍ പിന്നിട്ടപ്പോഴെക്കും അന്വേഷണ ചുമതലയുള്ള പ്രിന്‍സിപ്പല്‍ സെക്രട്ടറി മുഹമ്മദ് ഹനീഷിനെ ആരോഗ്യ വകുപ്പിലേക്ക് മാറ്റി. അന്വേഷണങ്ങള്‍ക്ക് തടസ്സം ഉണ്ടാകില്ലെന്ന് സര്‍ക്കാരിന്റെ ഭാഗത്ത് നിന്നും അറിയിച്ചിരുന്നു.
എന്നാല്‍ വ്യവസായ വകുപ്പ് പ്രിന്‍സിപ്പല്‍ സെക്രട്ടറി വിവാദങ്ങളില്‍ അന്വേഷണം ആരംഭിക്കുകയോ റിപ്പോര്‍ട്ട് സമര്‍പ്പിക്കുകയോ ചെയ്തിട്ടില്ല. വിവാദവുമായി ബന്ധപ്പെട്ട വിശദമായ വിവരങ്ങള്‍ ഒന്നും ഇതുവരെ ലഭിച്ചിട്ടില്ല. സമഗ്രമായ വിവരശേഖരണം നടത്തിയതിനുശേഷം മാത്രമേ അന്വേഷണത്തിലേയ്ക്ക് കടക്കാന്‍ സാധിക്കുകയുള്ളൂ എന്നാണ് വകുപ്പ് പറയുന്നത്.
