തൃശൂര്: സംസ്ഥാനത്ത് കോവിഡ് 19 രോഗം ബാധിച്ച് വീണ്ടും മരണം. തൃശൂരിലാണ് മരണം റിപ്പോര്ട്ട് ചെയ്തിരിക്കുന്നത്. മുംബൈയില് നിന്നും യാത്ര ചെയ്ത് വന്ന കടപ്പുറം അഞ്ചങ്ങാടി കെട്ടിങ്ങല് പോക്കാക്കില്ലത്ത് മുഹമ്മദിന്റെ ഭാര്യ കദീജക്കുട്ടി(73) യാണ് മരിച്ചത്. പാലക്കാട് വഴി മകനൊപ്പം പ്രത്യേക വാഹനത്തില് പെരിന്തല്മണ്ണയില് ഇവര് എത്തിയത് മറ്റ് മൂന്ന് പേര്ക്ക് ഒപ്പമാണ്. സ്ത്രീക്ക് ശ്വാസ തടസം അനുഭവപ്പെട്ടതിനെ തുടര്ന്ന് ഇവരുടെ മകന് പാര്ട്ടീഷനുള്ള ആംബുലന്സില് കഴിഞ്ഞ 20ന് ചാവക്കാട് താലൂക്ക് ആശുപത്രിയില് പ്രവേശിപ്പിച്ചു.
എന്നാല് ഇവരുടെ ആരോഗ്യസ്ഥിതി മോശമായതിനെ തുടര്ന്ന് മെഡിക്കല് കോളേജിലേക്ക് മാറ്റാന് മെഡിക്കല് സംഘം തീരുമാനിച്ചെങ്കിലും ഇന്നലെ മരണം സംഭവിക്കുകയായിരുന്നു. ഇവര്ക്ക് നേരത്തെ തന്നെ പ്രമേഹം, രക്താദിമര്ദം, ശ്വാസ തടസം തുടങ്ങിയ രോഗങ്ങളുണ്ടായിരുന്നു. ഇതിന് ചികിത്സ തേടുന്നുണ്ടായിരുന്നു.
കോവിഡ് പരിശോധനയ്ക്കുള്ള ഇവരുടെ സ്രവങ്ങള് സ്വീകരിക്കുകയും പരിശോധനയ്ക്ക് വിധേയമാക്കുകയും ചെയ്യുകയും ഫലം പോസറ്റീവ് ആയതിനെ തുടര്ന്ന് ഇവരുടെ മകനും ആംബുലന്സ് ഡ്രൈവറും ഇപ്പോള് ആരോഗ്യ വകുപ്പിന്റെ നിരീക്ഷണത്തിലുമാണ്.
ഇതോടെ കേരളത്തില് കോവിഡ് ബാധിച്ചു മരിച്ചവരുടെ എണ്ണം സംസ്ഥാനത്തിന്റെ കണക്കു പ്രകാരം നാലായി. കേന്ദ്ര ഗവണ്മെന്റിന്റെ കണക്കില് മരണം അഞ്ചാണ്. കേരളത്തില് ചികിത്സയ്ക്കെത്തിയശേഷം മരിച്ച മാഹി സ്വദേശിയെക്കൂടി കൂട്ടിയതിനാലാണിത്.