കാര്ഷിക ബില്ലിനെതിരെയുള്ള പ്രക്ഷോഭത്തിന് ഐക്യദാര്ഢ്യം പ്രകടിപ്പിച്ച് നാസിക്കില് നിന്നും മുംബൈലേക്ക് കര്ഷകരുടെ മഹാറാലി. മഹാരാഷ്ട്രയിലെ 21 ജില്ലകളിലുള്ള ആയിരക്കണക്കിന് കര്ഷകരാണ് 180 കിലോമീറ്റര് താണ്ടി മുംബൈയിലേക്ക് മാര്ച്ച് നടത്തുന്നത്. കൊടികള് വീശിയും ഫ്ലക്സുകള് പിടിച്ചും കര്ഷകരുടെ ഒരു വലിയ കൂട്ടം മാര്ച്ച് നടത്തുന്നതിന്റെ ദൃശ്യങ്ങള് സോഷ്യല് മീഡിയയില് പ്രചരിക്കുന്നുണ്ട്.
നിരവധി ചെറിയ സംഘടനകളില് നിന്നും ഒത്തുചേര്ന്ന ഈ കര്ഷകര് അഖിലേന്ത്യക കിസാന് സഭയുടെ നേതൃത്വത്തിലാണ് മാര്ച്ച് ചെയ്യുന്നത്. മണിക്കൂറുകള്ക്കകം റാലി മുംബൈയിലെത്തും. ശേഷം പ്രശസ്തമായ ആസാദ് മൈദാനില് തിങ്കളാഴ്ച ഇവര് പ്രകടനം നടത്തും. എന്.സി.പി നേതാവ് ശരത് പവാര് തിങ്കളാഴ്ച റാലിയില് പങ്കുചേരുമെന്ന് കരുതപ്പെടുന്നു