കരിപ്പൂര്‍ വിമാനത്താവളത്തിലെ യാത്രികർക്ക് ആശ്വാസവാർത്ത; വിമാനത്താവളത്തിലെ റാപ്പിഡ് പിസിആര്‍ പരിശോധന നിരക്ക് കുറച്ചു

കരിപ്പുര്‍ വിമാനത്താവളത്തിലെ യാത്രക്കാർക്ക് ആശ്വാസവാർത്ത. വിമാനത്താവളത്തിലെ റാപ്പിഡ് പിസിആര്‍ പരിശോധന നിരക്ക് 2,490 രൂപയില്‍ നിന്ന് 1,580 രൂപയായി കുറച്ചു. ആയിരത്തോളം രൂപ ഒറ്റയടിക്ക് കുറച്ചത് യാത്രക്കാർക്ക് വലിയ സഹായമാകും. എയർപോർട്സ് അതോറിറ്റി നിർദേശത്തെ തുടർന്നാണ് തീരുമാനം.

വ്യോമയാനമന്ത്രി ജ്യോതിരാദിത്യ സിന്ധ്യ അധ്യക്ഷനായ കണ്‍സള്‍ട്ടേറ്റീവ് കമ്മറ്റിയിലും പാര്‍ലമെന്‍ററി സ്ഥിരം സമിതിയിലും കെ മുരളീധരന്‍ എംപി ഈ വിഷയം ഉന്നയിച്ചിരുന്നു. തുടര്‍ന്ന് നിരക്ക് കുറയ്ക്കാമെന്ന് വ്യോമയാനസെക്രട്ടറി രാജീവ് ബന്‍സല്‍ അറിയിച്ചു. സമിതിയിലെ കേരളത്തില്‍ നിന്നുള്ള ഏക അംഗമാണ് കെ മുരളീധരന്‍.