കണ്ണൂര്: ദൈവങ്ങള്ക്ക് വോട്ടുണ്ടായിരുന്നെങ്കില് എല്ഡിഎഫിന് വോട്ടുചെയ്തേനെയെന്ന് സിപിഎം പിബി അംഗം കോടിയേരി ബാലകൃഷ്ണന്. സംസ്ഥാനത്ത് തുടര്ഭരണം ഉറപ്പാണെന്നും കോടിയേരി മാധ്യമങ്ങളോട് പറഞ്ഞു.
ശബരിമലയില് ഏറ്റവും കൂടുതല് വികസന പ്രവര്ത്തനങ്ങള് നടത്തിയ സര്ക്കാറാണിത്. ഇതു കൂടാതെ എല്ലാ മത വിശ്വാസികള്ക്കും സുരക്ഷിതത്വം ഉറപ്പാക്കിയ സര്ക്കാരാണ് പിണറായി സര്ക്കാര്. എല്ലാ ആരാധനാലയങ്ങള്ക്കും ഓരോ പ്രദേശത്തും വികസന പ്രവര്ത്തനങ്ങള് നടത്തി.
നിലവില് ഇടത്മുന്നണിക്ക് 95 സീറ്റ് ഉണ്ട്. ഫലം പുറത്തു വരുമ്ബോള് നൂറിലധികം സീറ്റ് നേടി ചരിത്ര വിജയത്തോടെ അധികാരത്തിലെത്തും. എല്ലാ ജില്ലകളിലും ഇടത് അനുകൂല തരംഗമാണ്. മുന്കാലങ്ങളില് ഇടതുപക്ഷത്തിന് അനുകൂല വിധി എഴുതാത്ത ജില്ലകളില് പോലും ഇക്കുറി ഇടത് അനുകൂല തരംഗമാണെന്നും അദ്ദേഹം അഭിപ്രായപ്പെട്ടു.
സ്വാമി അയ്യപ്പനും ഈ നാട്ടിലെ എല്ലാ ദേവഗണങ്ങളും തെരഞ്ഞെടുപ്പില് എല്ഡിഎഫ് സര്ക്കാരിനൊപ്പമായിരിക്കുമെന്ന് മുഖ്യമന്ത്രി പിണറായി വിജയനും നേരത്തേ പറഞ്ഞിരുന്നു.