ഇത്തവണ ഒഡിഷയും ബംഗാളും കൂടെ നിന്നു; അടുത്ത തവണ കേരളമെന്ന് ബിജെപി

വോട്ടെണ്ണല്‍ അവസാന ഘട്ടത്തിലേക്ക് കടക്കുമ്പോള്‍ ബിജെപി ഉറ്റുനോക്കുന്നത് കേരളത്തിലേക്കാണ്. ഇന്ത്യയിലെ കേരളവും തമിഴനാടും ഒഴികെ മറ്റെല്ലാ സംസ്ഥാനങ്ങളിലും ബി ജെ പി കാര്യമായ പ്രകടനം കാഴ്ചവച്ചിരുന്നു. എന്നാല്‍ ഇത്തവണ അക്കൗണ്ട് തുറക്കാന്‍ സാധിക്കാത്ത കേരളത്തില്‍ അടുത്ത തവണ പിടിക്കുമെന്ന് ഉറപ്പിച്ച് പറയുകയാണ് ബി.ജെ.പി നേതൃത്വം.

അടുത്ത തെരഞ്ഞെടുപ്പില്‍ കേരളത്തില്‍ ബിജെപി മികച്ച പ്രകടനം കാഴ്ചവെക്കുമെന്ന് ദേശീയ വക്താവ് ജി വി എല്‍ നരസിംഹ റാവു പറഞ്ഞു. ഇത്തവണ പശ്ചിമ ബംഗാളും ഒഡീഷയും കീഴടക്കിയതുപോലെ അടുത്ത തവണ കേരളവും പിടിക്കുമെന്നാണ് റാവുവിന്റെ പ്രഖ്യാപനം.

അതേസമയം 20 ല്‍ 19 സീറ്റുകളും നേടി കേരളത്തില്‍ കോണ്‍ഗ്രസ് ലീഡ് നേടിയപ്പോള്‍ ബിജെപിക്ക് ഒരു സീറ്റുപോലും നേടാനായില്ല. പശ്ചിമ ബംഗാളില്‍ ബിജെപി 19 സീറ്റില്‍ ലീഡ് നേടിയിട്ടുണ്ട്. ഒഡീഷയിലെ 21 സീറ്റില്‍ ഏഴു സീറ്റില്‍ ലീഡ് നേടിയിരുന്നു ബിജെപി.