നടന്‍ ദിലീപിനേതിരെ ആരോപണമുയര്‍ന്നപ്പോള്‍ അദ്ദേഹത്തെ പ്രതിയാണെന്ന് ഗണിച്ച്‌ കണ്ടെത്തിയവര് ലൈംഗികാതിക്രമ ആരോപണത്തില്‍ കുറ്റസമ്മതം നടത്തി പോസ്‌റ്റിട്ട വേടനെ ലൈക്ക് ചെയ്‌ത് പിന്തുണക്കുകയാണെന്ന് ഒമര് ലുലു ആരോപിക്കുന്നു. ലൈംഗിക അതിക്രമ ആരോപണത്തില്‍ മാപ്പുപറഞ്ഞുകൊണ്ട് മലയാളി റാപ്പ‌ര്‍ വേടന്‍ ഇന്‍സ്‌റ്റഗ്രാമിലിട്ട കുറിപ്പില്‍ ലൈക്ക് ചെയ്തവര്ക്കെതിരെ പരിഹാസവുമായി സംവിധായകന്‍ ഒമര് ലുലു. നടി പാര്‍വതി വേടന്റെ പോസ്റ്റിന് ലൈക്ക് ചെയ്തിരുന്നു.
സ്വയം ഫെമിനിസ്റ്റ് ആണെന്ന് പറഞ്ഞുനടക്കുന്ന ആളാണ് ലൈക്കിന് പോലും കൃത്യമായ രാഷ്ട്രീയമാനമുണ്ടെന്ന് പറഞ്ഞത്. അക്കണക്കിന് ഇരക്കൊപ്പമല്ല മാപ്പ് ഇരന്ന് പോസ്‌റ്റിടുന്ന പ്രതിക്കൊപ്പമാണ് അവരെന്നും ഇവരുടെ ഇരട്ടത്താപ്പ് ജനം തിരിച്ചറിയുമെന്ന് പ്രതീക്ഷിക്കുന്നതായും ഒമര് ലുലു ഫേസ്‌ബുക്ക് കുറിപ്പില്‍ പറയുന്നു.
ഒമര് ലുലുവിന്റെ ഫേസ്‌ബുക്ക് പോസ്‌റ്റിന്റെ പൂ‌ര്‍ണരൂപം ചുവടെ:
ആട്ടിന്‍തോലിട്ട പുരോഗമന കോമാളികള്‍
പീഢനാരോപണം നേരിട്ട് അതിനു മാപ്പ് ചോദിച്ചുകൊണ്ട് വേടന്‍ ഇന്‍സ്റ്റാഗ്രാമില്‍ ഇട്ട പോസ്റ്റില്‍ ലൈക്ക് ചെയ്തത് മലയാളത്തിലെ പ്രമുഖരായ ‘പുരോഗമന കോമാളികള്‍.’
പുരോഗമന കോമാളികള്‍ എന്ന് തന്നെ വേണം ഇവറ്റകളെ വിശേഷിപ്പിക്കാന്‍. അഥവാ ഇരയാകുന്ന സ്ത്രീകളെ ഉപയോഗപ്പെടുത്തി മാര്‍ക്കറ്റ് കൂട്ടുകയും ഇഷ്ടക്കാര്‍ പീഢന വിഷയത്തില്‍ ഉള്‍പ്പെടുമ്ബോള്‍ ഈ ഇരപക്ഷപാതം ആവിയായിപ്പോവുകയും ചെയ്യുന്നവരെ മറ്റ് എന്ത് വിളിക്കണം?
ദിലീപ് വിഷയത്തില്‍ അദ്ദേഹം പ്രതിയാണെന്ന് നേരത്തെ ഗണിച്ച്‌ കണ്ടെത്തിയവര്, അദ്ദേഹം പ്രതിയാകണമെന്ന് ഏറ്റവും കൊതിച്ചിരിക്കുന്നവര്‍ തന്നെയാണ്, മറ്റൊരു പീഢനക്കേസ് പ്രതി കുറ്റസമ്മതം നടത്തിയപ്പോള്‍ അതിനെ ലൈക്കടിച്ച്‌ പിന്തുണക്കുന്നവര്‍!
അല്ലാ, സ്വയം ഫെമിനിസ്റ്റ് ആണെന്ന് പറഞ്ഞുനടക്കുന്ന പ്രമുഖ മഹിള തന്നെയല്ലേ ഈയിടെ പറഞ്ഞത് ഒരു ‘ലൈക്കി’നു പോലും കൃത്യമായ രാഷ്ട്രീയമാനമുണ്ടെന്ന്? അങ്ങനെയെങ്കില്‍ നിങ്ങള്‍ ഇരയ്‌ക്കൊപ്പമല്ല, മാപ്പ് ഇരന്ന് പോസ്റ്റിടുന്നതിലൂടെ പ്രതിക്കൊപ്പമാണെല്ലേ തെളിയിച്ചത്? ‘സ്ത്രീപക്ഷ’ നിലപാടുകളുമായി മറ്റുള്ളവരെ പൊട്ടന്‍ കളിപ്പിക്കുന്നത് നിര്‍ത്താന്‍ സമയമായി.ഇനിയെങ്കിലും ഇവരുടെ ഒക്കെ ഇരട്ടത്താപ്പ് ജനം തിരിച്ച്‌ അറിയുമെന്ന് പ്രതീക്ഷിക്കുന്നു.
