നിബന്ധനകളോടെ രാജ്യത്ത് പത്ത്, പ്ലസ്ടു പരീക്ഷകള് നടത്താന് കേന്ദ്ര സര്ക്കാര് അനുമതി. വിദ്യാര്ഥികളുടെ അക്കാദമിക് താല്പ്പര്യങ്ങളുടെ അടിസ്ഥാനത്തിലാണ് അനുമതിയെന്ന് കേന്ദ്ര ആഭ്യന്തര മന്ത്രി അമിത് ഷാ അറിയിച്ചു. ലോക്ഡൗണ് കാരണം വിവിധ സംസ്ഥാന വിദ്യാഭ്യാസ ബോര്ഡുകള്, സി.ബി.എസ്.ഇ, ഐ.സി.എസ്.ഇ തുടങ്ങിയവയുടെ പരീക്ഷകളാണ് മാറ്റിവെച്ചിരുന്നത്.
നിബന്ധനകള്:
കണ്ടെയ്ന്മെന്റ് സോണുകളില് പരീക്ഷ കേന്ദ്രങ്ങള് പാടില്ല.
വിദ്യാര്ഥികള്, അധ്യാപകര്, ജീവനക്കാര് എന്നിവര് മാസ്ക് ധരിക്കണം.
സാമൂഹിക അകലം പാലിക്കണം. പരീക്ഷകേന്ദ്രങ്ങളില് തെര്മല് സ്ക്രീനിങ്, സാനിറ്റൈസര് എന്നിവ ഒരുക്കണം. പരീക്ഷ ആവശ്യാര്ഥം സര്ക്കാറുകള്ക്ക് പ്രത്യേക ബസുകള് ഏര്പ്പെടുത്താവുന്നതാണ്. കേരളത്തില് എസ്.എസ്.എല്.സി, പ്ലസ്ടു പരീക്ഷകള് ജൂണ് ആദ്യവാരം നടത്താനാണ് തീരുമാനിച്ചിട്ടുള്ളത്. നേരത്തെ മേയ് 26ന് തുടങ്ങുമെന്ന് അറിയിച്ചിരുന്നെങ്കിലും ബുധനാഴ്ച ചേര്ന്ന മന്ത്രിസഭ യോഗം തീയതി മാറ്റുകയായിരുന്നു. ലോക്ഡൗണിനെ തുടര്ന്ന് മാറ്റിവെച്ച സി.ബി.എസ്.ഇ 12ാം ക്ലാസ് പരീക്ഷ ജൂലൈ ഒന്നു മുതല് 15 വരെ നടത്താന് തീരുമാനിച്ചിട്ടുണ്ട്. വംശീയ ആക്രമണത്തെത്തുടര്ന്ന് വടക്കു-കിഴക്കന് ഡല്ഹിയില് മാത്രമാണ് 10ാം ക്ലാസ് പരീക്ഷ നടക്കാനുള്ളത്.