കോഴിക്കോട്: എം.എസ്.എഫ് മുന് ദേശീയ വൈസ് പ്രസിഡന്റ് ഫാത്തിമ തഹ്ലിയക്ക് ബിജെപിയിലേക്ക് ക്ഷണം. സുരേഷ്ഗോപി എംപിയാണ് ഫാത്തിമയെ ഫോണില് വിളിച്ച് താല്പര്യമറിയിച്ചത്. പ്രധാനമന്ത്രി നരേന്ദ്ര മോദിയുമായി കൂടിക്കാഴ്ചക്ക് അവസരം ഒരുക്കാമെന്നാണ് വാഗ്ദാനം. തഹ്ലിയയെ നോട്ടമിട്ട് സിപിഎം രംഗത്തുവന്നിരുന്നു.
എന്നാല് ബിജെപിയില് ചേരുന്നതിനെക്കുറിച്ച് ആലോചിക്കാന് പോലും കഴിയില്ലെന്ന മറുപടിയാണ് ഫാത്തിമ തഹ്ലിയ നല്കിയത്. ആദര്ശം കണ്ടാണ് പാര്ട്ടിയില് വന്നത് സ്ഥാനമാനങ്ങളോ അധികാരത്തിനോ വേണ്ടിയല്ല പാര്ട്ടിയില് വന്നതെന്ന ഫാത്തിമ തഹ്ലിയ പറഞ്ഞു. അതേസമയം പാര്ട്ടി മാറുന്നതിനെ കുറിച്ച് ചിന്തിച്ചിട്ടു പോലുമില്ലെന്ന് മറ്റു വാര്ത്തകള് ദുരുദ്ദേശപരമാണെന്നും ഫാത്തിമ തഹ്ലിയ പറഞ്ഞിരുന്നു.
അതേസമയം സ്ത്രീവിരുദ്ധ പരാമര്ശത്തിന്റെ പേരില് എം.എസ്.എഫ് സംസ്ഥാന നേതൃത്വത്തിനെതിരേ വനിതാ കമ്മീഷനില് വരെ പരാതിയെത്തിയതിന് പിന്നാലെയാണ് എം.എസ്.എഫ് ദേശീയ വൈസ് പ്രസിഡന്റ് ഫാത്തിമ തഹ്ലിയക്കെതിരേയുള്ള പുറത്താക്കല് നടപടി ലീഗ് കൈക്കൊണ്ടത്. ദേശീയ പ്രസിഡന്റ് ഖാദര് മൊയ്തീന് ഒപ്പുവച്ച് ഔദ്യോഗിക ലെറ്റര്പാഡില് പുറത്തിറക്കിയ വാര്ത്താകുറിപ്പിലാണ് തഹ്ലിയയെ സ്ഥാനത്തുനിന്നു നീക്കിയ വിവരം പുറത്തുവിട്ടത്. സംസ്ഥാന കമ്മിറ്റിയുടെ നിര്ദേശപ്രകാരമാണ് നടപടി സ്വീകരിക്കുന്നതെന്ന് വാര്ത്താകുറിപ്പില് പറയുന്നു.