മത്സരിച്ചിടത്തല്ലാം പകുതിയോളം വോട്ട് ‘അപ്രത്യക്ഷമായി’ബിഡിജെഎസിന് വന്‍ വോട്ടുചോര്‍ച്ച

കോട്ടയം: തങ്ങളുടെ സ്ഥാനാര്‍ഥികള്‍ക്ക് ബിജെപി വോട്ടുകള്‍ ലഭിച്ചില്ലെന്ന ആക്ഷേപമാണ് ബിഡിജെഎസ് ഉയര്‍ത്തുന്നത്. കഴിഞ്ഞ തദ്ദേശ തിരഞ്ഞെടുപ്പിലെ കാലുവാരല്‍ നിയമസഭാ തിരഞ്ഞെടുപ്പിലും ആവര്‍ത്തിച്ചുവെന്നും ഈ രീതിയില്‍ ഇനിയും മുന്നോട്ട് പോകാനാവില്ലെന്നാണ് നേതാക്കള്‍ പറയുന്നത്.

എന്‍ഡിഎ ഘടകകക്ഷിയും തുഷാര്‍ വെള്ളാപ്പള്ളി നേതൃത്വം നല്‍കുന്നതുമായ ബിഡിജെഎസിന് നിയമസഭാ തിരഞ്ഞെടുപ്പില്‍ വന്‍ വോട്ടു ചോര്‍ച്ച. മത്സരിച്ച ഭൂരിപക്ഷം മണ്ഡലങ്ങളിലും 2016-ല്‍ ലഭിച്ചതിനേക്കാള്‍ വോട്ട് പകുതിയായി മാറി. ബിഡിജെഎസിന് മുന്നേറ്റം പോയിട്ട് ഉള്ളത് നിലനിര്‍ത്താന്‍ പോലും ആയില്ലെന്ന് കഴിഞ്ഞ ദിവസം ബിജെപി കോര്‍കമ്മിറ്റി വിലയിരുത്തിയിരുന്നു.

തദ്ദേശ തിരഞ്ഞെടുപ്പില്‍ ബിഡിജെഎസിന് ഒരു വാര്‍ഡില്‍ പോലും ജയിക്കാനായിരുന്നില്ല. നിയമസഭാ തിരഞ്ഞെടുപ്പില്‍ 21 സീറ്റുകളിലേക്കാണ് ബിഡിജെഎസ് എന്‍ഡിഎ മുന്നണിയുടെ ഭാഗമായി മത്സരിച്ചിരുന്നത്. ഇതില്‍ ദയനീയമായ വോട്ട് ചോര്‍ച്ചയുണ്ടായത് മന്ത്രി എം.എം.മണി ജയിച്ച ഉടുമ്പന്‍ചോലയിലാണ്. 2016-ല്‍ 21799 വോട്ടുകള്‍ ഇവിടെ നിന്ന് ബിഡിജെഎസിന് ലഭിച്ചിരുന്നു.ഇത്തവണ കിട്ടിയത് വെറും 7208 വോട്ട്.

പി.സി.ജോര്‍ജിനെ അട്ടിമറിച്ച് എല്‍ഡിഎഫ് സ്ഥാനാര്‍ഥി സെബാസ്റ്റ്യന്‍ കുളത്തുങ്കല്‍ ജയിച്ച പൂഞ്ഞാറിലും ബിഡിജെഎസ് വോട്ടുകള്‍ വലിയ രീതിയില്‍ അപ്രത്യക്ഷമായി കഴിഞ്ഞ തവണ പൂഞ്ഞാറില്‍ ബിഡിജെഎസിന് 19966 വോട്ടുകള്‍ ലഭിച്ചപ്പോള്‍ ഇക്കുറി കിട്ടിയതാകട്ടെ 2965 വോട്ടുകള്‍ മാത്രം. ഇടുക്കിയില്‍ 2016-ല്‍ ബിഡിജെഎസ് സ്ഥാനാര്‍ഥിയായി മത്സരിച്ച ബിജു മാധവന്‍ 27403 വോട്ടുകള്‍ നേടിയിരുന്നു. ഇത്തവണ ഇടുക്കിയില്‍ മത്സരിച്ച പാര്‍ട്ടി സ്ഥാനാര്‍ഥി സംഗീത വിശ്വനാഥന് കിട്ടിയത് 9286 വോട്ടുകള്‍.