തൃശൂർ : റോഡിലെ കുഴിയിൽ വീണ് പരുക്കേറ്റ് ചികിത്സയിൽ ആയിരുന്ന വീട്ടമ്മ മരിച്ചു. നഗരസഭ പൊതുമരാമത്തു ഉദ്യോഗസ്ഥരുടെ അനാസ്ഥയിൽ ഒരു രക്തസാക്ഷി കൂടി. ചിയ്യാരം സ്വദേശി ബേബി ആന്റണിയാണ് മരിച്ചത്. കഴിഞ്ഞ ബുധനാഴ്ച രാത്രി പത്തു മണിക്കാണ് എംജി റോഡിലെ കുഴിയിൽ വീണാണ് വീട്ടമ്മയ്ക്ക് പരിക്കേറ്റത് .
ഭർത്താവുമൊത്തു വീട്ടു സാധനങ്ങൾ വാങി മടങ്ങും വഴി ആയിരുന്നു ബൈക്ക് കുഴിയിൽ വീണു മറിഞ്ഞത്. വീഴ്ചയിൽ തലക്ക് ഗുരുതരമായി പരിക്കേറ്റ ബേബിയെ സ്വകാര്യ ആശുപത്രിയിൽ അത്യാഹിത വിഭാഗത്തിൽ ചികിത്സയിൽ ഇരിക്കെയാണ് ഇന്ന് രാവിലെ മരണത്തിന് കീഴടങ്ങിയത്.
ബേബി ആന്റണി സ്വകാര്യ ആശുപത്രിയിലെ ജീവകാരിയാണ്. അപകടതിന് പിന്നാലെ ഉദ്യോഗസ്ഥർ എത്തി റോഡിലെ കുഴി മൂടിയിരുന്നു. തൃശ്ശൂർ കോര്പറേഷനാണ് എംജി റോഡിലെ അറ്റകുറ്റപണിയുടെ ചുമതല. നഗരത്തിലെ തിരക്കേറിയ റോഡിന്റെ ശോചനീയ അവസ്ഥയെ പറ്റി നിരന്തരം പരാതികൾ ഉയർന്നിരുന്നു.
