ഇന്ത്യൻ സൈന്യത്തിലെ 108 വനിത സൈനിക ഉദ്യോഗസ്ഥർക്ക് സ്ഥാനക്കയറ്റം

ന്യൂഡൽഹി. ഇന്ത്യൻ സൈന്യത്തിൽ സേവനമനുഷ്ഠിക്കുന്ന 108 വനിത സൈനിക ഉദ്യോഗസ്ഥരുടെ പദവി ഉയർത്തുന്നു. ലെഫ്റ്റനന്റ് കേണൽ പദവിയിൽ നിന്ന് കേണൽ പദവിയിലേക്കാണ് വനിതാ ഉദ്യോഗസ്ഥരുടെ പദവി ഉയർത്തുന്നത്. അതിനായി പ്രത്യേക സെലക്ഷൻ ബോർഡ് നടത്തുന്നതിനായി സേനയിലെ മുതിർന്ന ഉദ്യോഗസ്ഥർ അറിയിച്ചതായി ഒരു ദേശീയ മാധ്യമം റിപ്പോർട്ട് ചെയ്തു. സൈന്യത്തിലെ ലിംഗസമത്വം ഉറപ്പാക്കുന്നതിന്റെ ഭാഗമായാണ് ഈ നടപടി.

244 വനിത ഉദ്യോഗസ്ഥരെയാണ് സ്ഥാനക്കയറ്റം നൽകുന്നതിന്റെ ഭാഗമായി പരിഗണിക്കുന്നത്. ഇതിനായി 108 ഒഴിവുകളാണ് റിപ്പോർട്ട് ചെയ്തിട്ടുള്ളത്. 1992 മുതൽ 2006 വരെയുള്ള ബാച്ചുകളിൽ നിന്നാണ് തിരഞ്ഞെടുപ്പ് നടത്തുക. എഞ്ചീനിയേഴ്‌സ്, സിഗ്നൽസ് തുടങ്ങി നിരവധി സേനാ വകുപ്പുകളിൽ നിന്നാണ് തിരഞ്ഞെടുപ്പ് നടത്തുക. സ്ഥാനക്കയറ്റം ലഭിക്കുന്ന വനിതാ ഉദ്യോഗസ്ഥർ വിവിധ വകുപ്പുകളിലായി ജനുവരി അവസാനത്തോടെ നിയമിക്കപ്പെടും.

നേരത്തെ പുരുഷ ഉദ്യോഗസ്ഥൻ മാർക്ക് ലഭിക്കുന്ന അതേ അവസരങ്ങൾ ലഭിക്കുന്നതിനായി വനിതാ ഉദ്യോഗസ്ഥർക്ക് ഇന്ത്യൻ ആർമി പെർമനന്റ് കമ്മീഷൻ (പിസി) നടപ്പാക്കിയിരുന്നു. ഇത്തരത്തിൽ പി.സി ലഭിച്ച വനിതാ ഉദ്യോഗസ്ഥർ നിലവിൽ പ്രത്യേക പരിശീലനം നേടുകയാണ്. ജൂനിയർ ബാച്ച് പത്ത് വർഷത്തെ സേവനം പൂർത്തിയാക്കുമ്പോൾ വർക്ക് പി.സി നൽകുമെന്ന് ഉന്നത സൈനിക ഉദ്യോഗസ്ഥർ വ്യക്തമാക്കിയിട്ടുണ്ട്.