പഠിത്തത്തില്‍ ഉഴപ്പിയതിന് വീട്ടുകാര്‍ വഴക്ക് പറഞ്ഞു; ഒന്നര ലക്ഷം രൂപയും അടിച്ചുമാറ്റി പതിനാലുകാരന്‍ നാടുവിട്ടു

പഠിത്തത്തില്‍ ഉഴപ്പിയതിന് വീ്ടുകാര്‍ വഴക്കു പറഞ്ഞതിന് വീട്ടില്‍ നിന്ന് ഒന്നര ലക്ഷം രൂപയും അടിച്ചുമാറ്റി പതിനാലുകാരന്‍ നാടുവിട്ടു. കുറച്ചു ദിവസം അടിച്ചുപൊളിച്ച് ജീവിച്ച് പണം മുഴുവന്‍ തീരാറായപ്പോള്‍ മെല്ലെ നാട്ടിലേക്ക് വരാനൊരുങ്ങുന്നതിനിടെ പതിനാലുകാരനെ പോലീസ് പൊക്കി. നാടുവിട്ട പയ്യന്‍ പണം ഉപയോഗിച്ച് ഗോവയില്‍ ഉല്ലാസ ജീവിതം നയിക്കുകയായിരുന്നു.

ഗുജറാത്തിലെ വഡോദര സ്വദേശിയായ പത്താം ക്ലാസുക്ലാസുകാരനാണ് വീട്ടുകാര്‍ വഴക്ക് പറഞ്ഞതിന് നാടു വിട്ടത്. വീട്ടിലെ പണവും മോഷ്ടിച്ചാണ് പത്താം ക്ലാസുകാരന്‍ നാടുവിട്ടത്. പഠനത്തില്‍ ഉഴപ്പുന്നതിന് മാതാപിതാക്കളും മുത്തച്ഛനും കുട്ടിയെ ശാസിച്ചിരുന്നു. തുടര്‍ന്ന് കുട്ടിയെ വീട്ടില്‍ നിന്ന് കാണാതായി. തുടര്‍ന്ന് വീട്ടുകാര്‍ പൊലീസില്‍ പരാതിപ്പെട്ടു. വൈകാതെ വീട്ടിലിരുന്ന ഒന്നര ലക്ഷം രൂപയും കാണാനില്ലെന്ന് കണ്ടതോടെ നാടുവിട്ടതാവാം എന്ന് പൊലീസ് കണക്കുകൂട്ടി. തുടര്‍ന്ന് മൊബൈല്‍ ഫോണ്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തിലാണ് കുട്ടിയെ കണ്ടെത്തിയത്.

കുട്ടി ഗോവയിലേക്കാണ് പോയതെന്ന് പൊലീസ് പറയുന്നു. വീട്ടില്‍ നിന്നു റെയില്‍വേ സ്‌റ്റേഷനിലെത്തി തീവണ്ടി മാര്‍ഗം ഗോവയിലെത്താനായിരുന്നു പദ്ധതി. എന്നാല്‍ ആധാര്‍ കാര്‍ഡ് ഇല്ലാത്തതിനാല്‍ ടിക്കറ്റ് ലഭിച്ചില്ല. തുടര്‍ന്ന് ബസില്‍ പൂനെയിലേക്കും അവിടെ നിന്ന് ഗോവയിലേക്കും യാത്ര ചെയ്യുകയായിരുന്നു. ഗോവയിലെത്തിയ കുട്ടി പബുകളിലാണ് കൂടുതല്‍ സമയവും ചെലവഴിച്ചത്.

കയ്യിലെ പണം തീരാറായതോടെ നാട്ടിലേക്ക് മടങ്ങാനായി ഗോവയില്‍ നിന്ന് പൂനെയിലെത്തി പുതിയ സിം കാര്‍ഡ് വാങ്ങി ഫോണിലിട്ടു. ഫോണ്‍ ഓണായതിനെ തുടര്‍ന്ന് ലൊക്കേഷന്‍ വ്യക്തമായ പൊലീസ് സ്ഥലത്തെത്തി കുട്ടിയെ കസ്റ്റഡിയിലെടുത്തു. പിന്നീട് പൂനെ പൊലീസ് കുട്ടിയെ വഡോദര പൊലീസിനു കൈമാറുകയായിരുന്നു.