ഒരാള്‍ കുടിക്കാനെടുത്ത് വെള്ളം അടുത്തയാള്‍ കുടിച്ചു, ഇരട്ടകളില്‍ ഒരാള്‍ ജീവനൊടുക്കി

തിരുവനന്തപുരം: നെയ്യാറ്റിന്‍കരയില്‍ 15കാരന്‍ ജീവനൊടുക്കിയത് വെള്ളം കുടിച്ചതിനെ തുടര്‍ന്നുണ്ടായ തര്‍ക്കത്തെ തുടര്‍ന്ന്. വ്‌ളാങ്ങാമുറി കൃഷ്ണകൃപയില്‍ അനില്‍കുമാറിന്റെയും സിന്ധുവിന്റെയും ഇരട്ട മക്കളില്‍ ഒരാളായ ഗോകുല്‍ കൃഷ്ണയാണ് ജീവനൊടുക്കിയത്. പത്താം ക്ലാസ് വിദ്യാര്‍ത്ഥിയായിരുന്നു.

തിങ്കളാഴ്ച രാത്രി 9.30നായിരുന്നു നാടിനെ നടുക്കിയ സംഭവം ഉണ്ടായത്. ഇരട്ട സഹോദരങ്ങളായ ഗോകുലും ഗൗതമും ഭക്ഷണം കഴിക്കാനിരിക്കവെ ഗൗതം കൊണ്ടുവന്ന വെള്ളം ഗോകുല്‍ എടുത്ത് കുടിച്ചു. ഇതിന് പിന്നാലെ ഇരുവരും തമ്മില്‍ വഴക്കുണ്ടായി. വഴക്ക് രൂക്ഷമായതോയെ ഗോകുല്‍ മുറിയില്‍ കയറി വാതിലടച്ചു. മാതാപിതാക്കളെത്തി വാതില്‍ തുറന്ന് നോക്കിയപ്പോള്‍ ജനലില്‍ തൂങ്ങി മരിച്ച നിലയിലാണ് മകനെ കണ്ടെത്തിയത്. ഉടന്‍ തന്നെ ഗോകുലിനെ ആശുപത്രിയിലെത്തിച്ചെങ്കിലും മരിച്ചിരുന്നു.

ഇരട്ടകളായ ഗോകുല്‍കൃഷ്ണയും ഗൗതംകൃഷ്ണയും നെയ്യാറ്റിന്‍കര വിശ്വഭാരതി സ്‌കൂളിലെ പത്താം ക്ലാസ് വിദ്യാര്‍ത്ഥികളാണ്. ഷാള്‍ ജനലില്‍ കെട്ടിയിട്ട് ഗോകുല്‍ തൂങ്ങിമരിക്കുകയായിരുന്നു നെയ്യാറ്റിന്‍കര പോലീസ് വ്യക്തമാക്കി. അച്ഛന്‍ അനില്‍കുമാര്‍ മംഗലാപുരം എയര്‍പോര്‍ട്ടിലെ ഡ്യൂട്ടിഫ്രീ ഷോപ്പിലെ ജീവനക്കാരനാണ്. സംഭവസമയത്ത് വീട്ടില്‍ അമ്മ സിന്ധുവും സഹോദരി ഗായത്രിയും സഹോദരന്‍ ഗൗതംകൃഷ്ണയുമാണ് ഉണ്ടായിരുന്നത്. സംഭവത്തില്‍ നെയ്യാറ്റിന്‍കര പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.