സത്യപ്രതിജ്ഞ: 43 പേർ ദൈവനാമത്തിലും 13 പേർ അള്ളാഹുവിന്റെ നാമത്തിലും 80 സഗൗരവത്തിലും പ്രതിജ്ഞ ചെയ്തു; ആകെ 136 പേർ

15-ാം കേരള നിയമസഭയിലെ 136 എം എൽ എ മാരുടെ സത്യപ്രതിജ്ഞ കഴിഞ്ഞു. പ്രോടെം സ്പീക്കർ പിടിഎ റഹിം മുമ്പാകെയാണ് ഇവർ സത്യപ്രതിജ്ഞ ചെയ്തത്. തുടർന്ന് ആദ്യ സമ്മേളനം ആരംഭിച്ചു. 43 പേർ ദൈവനാമത്തിലും 13 പേർ അള്ളാഹുവിന്റെ നാമത്തിലും 80 പേർ സഗൗരവത്തിലും സത്യപ്രതിജ്ഞ ചെയ്തു. സിപിഎം നിരയിൽ നിന്ന് ആന്റണി ജോൺ, ദലീമ, വീണാ ജോർജ് എന്നിവർ ദൈവനാമത്തിലാണ് സത്യപ്രതിജ്ഞ ചെയ്തത്. 2 മണിക്കൂർ 50 മിനിട്ടുകൊണ്ടാണ് സത്യപ്രതിജ്ഞ ചടങ്ങുകൾ പൂർത്തിയായത്.

കോവളം എംഎൽഎ എം വിൻസെന്റ്, നെൻമാറ എംഎൽഎ കെ ബാബു എന്നിവർ കോറോണ ബാധിതരായതിനാലും താനൂർ എംഎൽഎ വി. അബ്ദുറഹ്മാന് ശാരീരിക അവശതകൾ മൂലവും സഭയിൽ എത്തിയില്ല. ഈ മൂന്ന് പേർ പിന്നീട് സ്പീക്കർക്ക് മുന്നിൽ സത്യപ്രതിജ്ഞ ചെയ്യും. ദേവികുളം എംഎൽഎ എ രാജ തമിഴിലാണ് സത്യപ്രതിജ്ഞ ചൊല്ലിയത്. മഞ്ചേശ്വരം എംഎൽഎ എകെഎം അഷറഫ് കന്നഡയിലാണ് പ്രതിജ്ഞ ചൊല്ലിയത്. മാണി സി കാപ്പൻ, മാത്യു കുഴൽ നാടൻ എന്നീ യുഡിഎഫ് എംഎൽഎമാർ ഇംഗ്ലീഷിലായിരുന്നു സത്യവാചകം ചൊല്ലിയത്.

ഇംഗ്ലീഷ് അക്ഷരമാല ക്രമത്തിലായിരുന്നു സത്യപ്രതിജ്ഞ ചെയ്യാൻ വിളിച്ചത്. വള്ളിക്കുന്ന് എംഎൽഎ പി അബ്ദുൾ ഹമീദാണ് ആദ്യം അധികാരം ഏറ്റെടുത്തത്. അള്ളാഹുവിന്റെ നാമത്തിലായിരുന്നു അബ്ദുൾ ഹമീദ് സത്യപ്രതിഞ്ജ ചെയ്തത്. വടക്കാഞ്ചേരി എംഎൽഎ സേവ്യർ ചിറ്റിലപ്പള്ളിയാണ് അവസാനം പ്രതിജ്ഞ ചെയ്തത്. 132-ാമതായി മുഖ്യമന്ത്രിയും 107-ാം സ്ഥാനക്കാരനായി പ്രതിപക്ഷ നേതാവ് വിഡി സതീശനും സത്യ പ്രതിജ്ഞ ചെയ്തു.