പതിനേഴ്കാരനെ തല്ലിച്ചതച്ച് ഗുണ്ടാ സംഘം ; യുവതിക്കെതിരെ വ്യാജ പോക്‌സോ കേസ് നൽകണമെന്ന് ആവശ്യം

തൃശൂർ : യുവതിക്കെതിരെ വ്യാജ പോക്‌സോ കേസ് നൽകണമെന്ന് ആവശ്യപ്പെട്ട് തൃശ്ശൂരിൽ പതിനേഴ്കാരനെ
ഗുണ്ടാ സംഘം തല്ലിച്ചതച്ചു. വരന്തരപ്പിള്ളി തേനന്തറ സ്വദേശി നിരഞ്ജനാണ്  മർദനമേറ്റത്. അപരിചിതയായ യുവതിക്കെതിരെ പോക്‌സോ കേസ് നൽകണമെന്നായിരുന്നു സംഘത്തിന്റെ ആവശ്യം. ഇതിന് സമ്മതിക്കാത്തതിനെ തുടർന്നാണ് കുട്ടിയെ ഗുണ്ടകൾ മർദിച്ചത്.

തനിയ്‌ക്ക് ഇന്ന് വരെ യാതൊരുവിധ പരിചയവുമില്ലാത്ത സ്ത്രീയുടെ ഫോട്ടോ കാണിച്ച് അവർക്കെതിരെ കേസ് നൽകണമെന്ന് ആവശ്യപ്പെട്ടുകൊണ്ടാണ് നിരഞ്ജനെ ഉപദ്രവിച്ചത്. 12 മണിക്കൂറോളം ഗുണ്ടാ സംഘം മർദിച്ചുവെന്നാണ് കുട്ടിയുടെ മൊഴി. ബിയർ കുപ്പി കൊണ്ട് അടിക്കുകയും ചവിട്ടി വീഴ്‌ത്തുകയും ചെയ്തിരുന്നു.

ഇന്നലെ രാവിലെ എട്ട് മുതൽ രാത്രി എട്ട് വരെ തുടർച്ചയായി ഉപദ്രവിച്ചുവെന്നാണ് കുട്ടിയുടെ പരാതി. സുഹൃത്തുക്കളെ ഉപയോഗിച്ച് കുട്ടിയെ ഇന്നലെ ഗുണ്ടാ സംഘത്തിന് മുന്നിൽ എത്തിക്കുകയായിരുന്നു. നിർബന്ധിച്ച് ലഹരി ഉപയോഗിപ്പിച്ചതിന് ശേഷം ചൈൽഡ് ലൈനിന്റെ ടോൾ ഫ്രീ നമ്പറിലേക്ക് വിളിച്ച് പരാതി കൊടുപ്പിച്ചതായും നിരഞ്ജൻ പറഞ്ഞു. തലയ്‌ക്ക് പിന്നിൽ ബിയർ കുപ്പി കൊണ്ട് അടിക്കാൻ ഓങ്ങി ഭയപ്പെടുത്തിയാണ് ചൈൽഡ് ലൈനിൽ സംസാരിപ്പിച്ചതെന്നും കുട്ടി പറയുന്നു. വിവരം പുറത്തു പറഞ്ഞാൽ തന്നെയും അമ്മയെയും കൊല്ലുമെന്ന് അക്രമികൾ ഭീഷണി മുഴക്കിയതായും പരാതിയിലുണ്ട്.