2021-ലെ പ്രളയത്തിൽ നഷ്ടമായ ബൈക്ക് രണ്ട് വർഷത്തിന് ശേഷം ആറ്റിൽ

കോട്ടയം: പ്രളയത്തിൽ നഷ്ടമായ ബൈക്ക് രണ്ട് വർഷത്തിന് ശേഷം ആറ്റിൽ നിന്ന് കിട്ടി. 2021-ലെ പ്രളയത്തിൽ
വർക്ക് ഷോപ്പിൽ നിന്നും നഷ്ടപ്പെട്ട ബൈക്ക് പുല്ലകയാറ്റിൽ മണലിൽ പതിഞ്ഞ നിലയിലാണ് കണ്ടെത്തിയത്.
കൊക്കയാർ കളപ്പുരയ്‌ക്കൽ കെ.ആർ സുരേഷിന്റെ മകൻ ജിഷ്ണു ഉപയോഗിച്ചിരുന്ന ബൈക്കാണ് തിരികെക്കിട്ടിയത്. ബൈക്ക് ഉപയോഗശൂന്യമായ അവസ്ഥയിലാണ്.

വാഹനത്തിനുണ്ടായ സ്റ്റാർട്ടിങ് ട്രബിൾ ശെരിയാക്കുന്നതിനായാണ് ജിഷ്ണു ടൗണിൽ പുല്ലകയാറിന് സമീപമുള്ള വർക്ക് ഷോപ്പിൽ ബൈക്ക് ഏൽപ്പിച്ചത്. പിന്നീട് കടയിൽ സൂക്ഷിച്ചിരുന്നബൈക്ക് വെള്ളപ്പൊക്കത്തിൽ പോയി എന്ന് കടയുടമ അറിയിച്ചതായി ഇവർ പറയുന്നു. പ്രളയസമയത്ത് ബൈക്ക് ദൂരേക്ക് ഒഴുകി പോയി കാണും എന്നായിരുന്നു ഇവരുടെ നിഗമനം.

കഴിഞ്ഞ ദിവസം ആറ്റിൽ മണിലിൽ പതിഞ്ഞ നിലയിൽ ബൈക്ക് കണ്ടെത്തുകയായിരുന്നു. ടൗണിന് സമീപം പുനർജനി പദ്ധതി പ്രകാരം ഒരു വർഷം മുൻപ് കല്ലും മണലും എല്ലാം നീക്കം ചെയ്തിരുന്നു. എന്നാൽ പ്രളയത്തിൽ നഷ്ടപ്പെട്ട അവശിഷ്ടങ്ങൾ ഒന്നും കിട്ടിയിരുന്നില്ല. കണ്ടെത്തിയ ബൈക്കിന് പുറമെ യാതൊരു കേടുപാടുകളും ഉണ്ടായിരുന്നില്ല.