പത്താൻ സിനിമക്കെതിരെ കേസ് എടുത്ത് മുംബൈ പൊലീസ്

ശക്തമായ പതിഷേധങ്ങൾക്ക് ഒടുവിൽ പത്താൻ സിനിമക്കെതിരെ മുംബൈ പൊലീസ് കേസ് എടുത്തു. ചിത്രത്തിലെ ബേഷരം രംഗ് എന്ന ഗാനം ഹിന്ദുമതത്തിന് എതിരാണെന്ന മുംബൈ സ്വദേശി സഞ്ജയ് തിവാരിയുടെ പരാതിപ്പെട്ടത്. ഇതിലാണ് നടപടി. കൂടാതെ സിനിമയുടെ പ്രദർശനം വിലക്കണമെന്നാവശ്യപ്പെട്ട് ബീഹാർ മുസഫർ നഗർ സിജെഎം കോടതിയിലും ഹർജി ഫയൽ ചെയ്തു.

ബേഷരം രംഗ് എന്ന ഗാന രംഗത്തിലെ ദീപിക പദുക്കോണിന്റെ കാവി വസ്ത്രത്തെ ചൊല്ലിയാണ് വിവാദം. ഹിന്ദുക്കളെ അവഹേളിക്കുന്നതും ഇന്ത്യൻ സംസ്കാരത്തിന് ചേരാത്തതുമാണെന്ന് ആരോപിച്ച് നിരവധി പരാതികളാണ് വിവിധ പൊലീസ് സ്റ്റേഷനുകളിൽ ഫയൽ ചെയ്തിട്ടുള്ളത്. മുംബൈ പൊലീസിന് ഒന്നിലധികം പരാതികൾ ലഭിച്ചിട്ടുണ്ട്. അതിൽ മുംബൈ സ്വദേശി സജ്ഞയ് തിവാരിയുടെ പരാതിയിലാണ് എഫ്ഐആർ റജിസ്റ്റർ ചെയ്തിട്ടുള്ളത്.

ഹിന്ദുക്കളെ പരിഹസിക്കാനാണ് ബോളിവുഡ് സിനിമകൾ നിർമ്മിക്കുന്നതെന്നും ധൈര്യമുണ്ടെങ്കിൽ ഇസ്‌ലാമിനെയും പ്രവാചകനെയും കുറിച്ച് സിനിമയെടുക്കു എന്നും കേന്ദ്ര മന്ത്രി ഗിരിരാജ് സിങ് പ്രതികരിച്ചു. സിനിമയുടെ പ്രദർശനം തടയാനാണ് വിശ്വഹിന്ദു പരിഷത്തും കർണി സേനയും അടക്കമുള്ള സംഘടനകളുടെയും നീക്കം.