ക്രൈസ്തവർക്ക് നേരെ ആക്രമണങ്ങൾ ഉണ്ടാകാതിരിക്കാൻ നടപടി – പ്രധാന മന്ത്രി

കൊച്ചി . രാജ്യത്തെ എല്ലാ മതവിശ്വാസികൾക്കും സംരക്ഷണം ഒരുക്കുമെന്ന് പ്രധാനമന്ത്രി നരേന്ദ്ര മോദി. ക്രൈസ്തവ മതമേലക്ഷന്മാരുമായുള്ള കൂടിക്കാഴ്ചയിലാണ് പ്രധാനമന്ത്രി ഇക്കാര്യം പറഞ്ഞത്. ക്രൈസ്തവർക്ക് നേരെയുള്ള ആക്രമണങ്ങൾ ഉണ്ടാകാതിരിക്കാൻ നടപടികൾ സ്വീകരിക്കും. സഭയുടെ ആശങ്കകൾ തന്റെ ശ്രദ്ധയിൽ ഉണ്ട് – നരേന്ദ്ര മോദി പറഞ്ഞു.

വെല്ലിങ്ഡന്‍ ദ്വീപിലെ ഹോട്ടല്‍ താജ് മലബാര്‍ വച്ചായിരുന്നു ക്രൈസ്തവ മതമേലക്ഷന്മാ രുമായുള്ള കൂടിക്കാഴ്ച. 20 മിനിറ്റ് നേരം കൂടിക്കാഴ്ച നീണ്ടു. ബിജെപി സംസ്ഥാന പ്രസിഡന്റ് കെ സുരേന്ദ്രനും കെഎസ് രാധാകൃഷ്ണനും കൂടിക്കാഴ്ചയില്‍ പങ്കെടുത്തു. കൂടിക്കാഴ്ച സൗഹാര്‍ദപരമായിരുന്നുവെന്നും കേരളത്തിന്റെ വികസനത്തെ കുറിച്ച് ചര്‍ച്ച ചെയ്‌തെന്നും കെ സുരേന്ദ്രന്‍ പറഞ്ഞു.

സഭയുടെ ആശങ്കകളും ആവശ്യങ്ങളും പ്രധാനമന്ത്രിയെ അറിയിച്ചതായി ക്രൈസ്തവ സഭ മേലധ്യക്ഷൻമാർ തുടർന്ന് മാധ്യമങ്ങളോട് പറഞ്ഞു. പ്രധാനമന്ത്രിയുമായുള്ള സംഭാഷണം വളരെ നന്നായിരുന്നതായി കൂടിക്കാഴ്ചക്ക് ശേഷം ബിഷപ്പുമാർ പ്രതികരിച്ചു.

ബിഷപ്പ് മാരായ മാർ ജോർജ്ജ് ആലഞ്ചേരി – സിറോ മലബാർ സഭ, ബസേലിയോസ് മാർതോമ്മ മാത്യൂസ് ത്രിതീയൻ കാതോലിക്ക – ഓർത്തഡോക്സ് സഭ, ജോസഫ് മാർ ഗ്രീഗോറിയോസ് – യാക്കോബായ സഭ, മാർ മാത്യു മൂലക്കാട്ട്, ക്നാനായ കത്തോലിക്ക സഭ – കോട്ടയം, മാർ ഔജിൻ കുര്യാക്കോസ് – കൽദായ സുറിയാനി സഭ, കർദ്ദിനാൾ മാർ ക്ലീമിസ് – സിറോ മലങ്കര സഭ, ആർച്ച്ബിഷപ് മാർ ജോസഫ് കളത്തിപ്പറമ്പിൽ – ലത്തീൻ കത്തോലിക്ക സഭ, കുര്യാക്കോസ് മാർ സേവേറിയൂസ് – ക്നാനായ സിറിയൻ സഭ, ചിങ്ങവനം, എന്നിവരാണ് പ്രധാനമന്ത്രിയുമായി കൂടിക്കാഴ്ച നടത്തിയത്.