പ്രണയാഭ്യര്‍ത്ഥന നിരസിച്ചതിന് പെണ്‍കുട്ടിയെ ബസില്‍ നിന്ന് വലിച്ച് താഴെയിട്ട് മര്‍ദനം, 20കാരന്‍ പോലീസ് പിടിയില്‍

കൊച്ചി: പ്രണയാഭ്യര്‍ത്ഥന നിരസിച്ചതിന് പെണ്‍കുട്ടിയെ ബസില്‍ നിന്നും വലിച്ചിറക്കി നിലത്തിട്ട് മര്‍ദ്ദിക്കാന്‍ ശ്രമിച്ച 20കാരനെ പോലീസ് അറസ്റ്റ് ചെയ്തു. പെരുമ്പടപ്പ് തുരുത്തിക്കാട് വീട്ടില്‍ പ്രണവിനെയാണ് പോലീസ് പിടികൂടിയത്. പ്രണയാഭ്യര്‍ത്ഥന നിരസിച്ചതിന് പെണ്‍കുട്ടിയെ പൊതുജനമധ്യത്തില്‍ വെച്ച് പ്രണവ് ആക്രമിക്കുകയായിരുന്നു. നാട്ടുകാരാണ് ഇയാളെ പിടികൂടി പോലീസില്‍ ഏല്‍പ്പിച്ചത്.

എറണാകുളത്ത് പട്ടാപ്പകലാണ് സംഭവമുണ്ടായത്. ഐടിഐ വിദ്യാര്‍ത്ഥിനിയായ പെണ്‍കുട്ടിയോട് പ്രണവ് പ്രണയാഭ്യര്‍ത്ഥന നടത്തിയെങ്കിലും പെണ്‍കുട്ടി നിഷേധിക്കുകയായിരുന്നു. ഇന്നലെ വൈകുന്നേരം അഞ്ചരയോടെ തോപ്പുംപടി ജങ്ഷനില്‍ വെച്ച് പ്രതി പെണ്‍കുട്ടിയെ മര്‍ദ്ദിക്കുകയായിരുന്നു. ബസിനുള്ളില്‍ വെച്ച് പ്രണവ് പെണ്‍കുട്ടിയെ കൈയ്യില്‍ കയറി പിടിക്കുകയും തോപ്പുംപടി ജങ്ഷനില്‍ എത്തിയപ്പോള്‍ ബസില്‍ നിന്നും വലിച്ച് താഴെയിടുകയും ചെയ്തു.

പെണ്‍കുട്ടിയോട് ഫോണ്‍ നല്‍കാന്‍ പ്രതി ആവശ്യപ്പെട്ടു. എന്നാല്‍ പെണ്‍കുട്ടി ഇതിന് തയ്യാറായില്ല. ഫോണ്‍ കിട്ടാതെ വന്നതോടെ പെണ്‍കുട്ടിയുടെ മുടിക്ക് കുത്തിപ്പിടിച്ച് നിലത്ത് വീഴ്ത്തിയ ശേഷം പ്രണവ് മര്‍ദ്ദിക്കാന്‍ ശ്രമിക്കുകയായിരുന്നു. ഈ സമയം സംഭവ സ്ഥലത്തുണ്ടായിരുന്നവര്‍ പ്രണവിനെ തടഞ്ഞു. പ്രതിയെ തടഞ്ഞു വെച്ച ശേഷം പോലീസില്‍ നാട്ടുകാര്‍ വിവരം അറിയിച്ചു. തുടര്‍ന്ന് പോലീസ് എത്തി പെണ്‍കുട്ടിയുടെ പരാതിയില്‍ കേസ് എടുക്കുകയും പ്രതിയെ അറസ്റ്റ് ചെയ്യുകയും ചെയ്തു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. പെണ്‍കുട്ടിയും പ്രതിയും മുന്‍പ് ഒരുമിച്ച് പഠിച്ചിരുന്നവരാണെന്ന് പൊലീസ് പറയുന്നു. പ്രണയാഭ്യര്‍ത്ഥന നിരസിച്ചതിനെ തുടര്‍ന്നാണ് പ്രതി ആക്രമിച്ചതെന്നാണ് പെണ്‍കുട്ടിയുടെ പരാതി.