20 വര്‍ഷം മുന്‍പ് നഷ്ടപ്പെട്ട സ്വര്‍ണ്ണം വീട്ടിലേക്ക് ഭക്ഷണപ്പൊതിക്കുള്ളിൽ പാഴ്സലായെത്തി

ഇരുപത് വര്‍ഷം മുന്‍പ് മോഷ്ടിക്കപ്പെട്ട സ്വര്‍ണ്ണം പാര്‍സലായി തിരിച്ച്‌ ലഭിച്ചതിന്‍റെ സന്തോഷത്തിലാണ് പ്രവാസിയും കുടുംബവും. നെല്ലിക്കുന്നില്‍ ഇബ്രാഹിം തൈവളപ്പിന്‍റെ കുടുംബത്തിനുമാണ് വ്യത്യസ്തമായ അനുഭവം. 20 വര്‍ഷം മുന്‍പ് ഇബ്രാഹിമിന്‍റെ ഭാര്യയുടെ നഷ്ടപ്പെട്ട രണ്ട് പവന്‍റെ സ്വര്‍ണ്ണാഭരണങ്ങള്‍ക്ക് പകരം രണ്ട് സ്വര്‍ണ്ണനാണയങ്ങളാണ് അജ്ഞാതനായ ഒരു യുവാവ് പാര്‍സലായി മെയ് 17ന് വൈകുന്നേരം വീട്ടിലെത്തിച്ചത്

രണ്ട് ദിവസം മുമ്പ് നോമ്പ് തുറക്കാന്‍ ഏതാനും മിനുട്ടുകള്‍ മാത്രം ബാക്കിയിരിക്കെ വീട്ടിലെ കോളിംഗ് ബെല്‍ അടിച്ചതിനെതുടർന്ന് ഇബ്രാഹിമിന്റെ ഭാര്യ വാതില്‍ തുറന്നപ്പോള്‍ കണ്ടത് ഹെല്‍മെറ്റ് ധരിച്ച പയ്യന്‍ പൊതിയുമായി നില്‍ക്കുന്നതാണ്. ഉടനെ ഇതാ ഇത് വാങ്ങണം, നോമ്പ് തുറക്കാനുള്ള നെയ്ച്ചോറും കറിയുമാണ് എന്ന് പറഞ്ഞ് ആ പയ്യന്‍ പൊതി അവര്‍ക്കു നേരെ നീട്ടി. സംശയമൊന്നും തോന്നാത്തതിനാല്‍ ഭാര്യ അത് വാങ്ങി. എന്നാല്‍ ആരാണ് പേരെന്താണ് എന്നൊക്കെ ചോദിക്കുന്നതിനിടയില്‍ ഇതൊരാള്‍ തന്നയച്ചതാണെന്നും ഇവിടെ തരാനാണ് പറഞ്ഞത് അയാള്‍ അപ്പുറത്തുണ്ടെന്നുമാണ് അവന്‍ മറുപടി നല്‍കിയത്. നോമ്ബ് തുറന്ന് പയ്യന്‍ കൊണ്ടുവന്ന പൊതി അഴിച്ചു നോക്കിയപ്പോള്‍ നെയ്ച്ചോറും കറിയും. അതിനകത്ത് ചെറിയൊരു പൊതി. ആശ്ചര്യത്തോടെ ആ പൊതി അഴിച്ചു നോക്കിയപ്പോള്‍ ഒരു തുണ്ട് കടലാസും രണ്ട് സ്വര്‍ണ നാണയങ്ങളും. കൂടെ കടലാസില്‍ എഴുതിയ കുറിപ്പും.

അസ്സലാമു അലൈക്കും, നിന്റെ 20 കൊല്ലം മുമ്പ് നഷ്ടപ്പെട്ട പൊന്ന് എനിക്ക് കിട്ടിയിരുന്നു. അത് ആ സമയം നിനക്ക് തരാന്‍ എനിക്ക് സാധിച്ചില്ല. അതുകൊണ്ട് അതിന് പകരമായി ഈ പവന്‍ നീ സ്വീകരിച്ച്‌ എനിക്ക് പൊറുത്ത് തരണം എന്ന് അപേക്ഷിക്കുന്നു’ എന്നാണ് കുറിപ്പ് എഴുതിയത്. വീട്ടുകാര്‍ ഉടന്‍ ഗള്‍ഫിലുള്ള ഇബ്രാഹിമിനെ വിവരമറിയിച്ചു. ആര്‍ക്കും വിശ്വസിക്കാനായില്ല. 20 വര്‍ഷം മുമ്പ് ഒരു വിവാഹ വീട്ടില്‍ വെച്ച്‌ ഇബ്രാഹിമിന്റെ ഭാര്യ അണിഞ്ഞിരുന്ന മൂന്നരപ്പവന്‍ സ്വര്‍ണാഭരണങ്ങളാണ് നഷ്ടപ്പെട്ടത്. തിരച്ചിലില്‍ ഒന്നരപ്പവന്‍ ആഭരണം കിട്ടിയിരുന്നു. എന്നാല്‍ ആ സംഭവം വീട്ടുകാര്‍ മറന്നിരിക്കെ കാലങ്ങള്‍ക്ക് ശേഷമാണ് അജ്ഞാതന്‍ സ്വര്‍ണനാണയത്തിന്റെ രൂപത്തില്‍ ഇബ്രാഹിമിന്റെ വീട്ടിലേക്ക് എത്തിച്ചത്.