ബത്‌ലഹേമിൽ കുടുങ്ങി 38 മലയാളികൾ, എങ്ങോട്ടും നീങ്ങാൻ പറ്റാത്ത സ്ഥിതിയെന്ന് ടൂർ ഓപ്പറേറ്റർ

ഹമാസ് ആക്രമണം തുടരുന്ന ഇസ്രയേലിൽ കേരളത്തിൽ നിന്നുള്ള സംഘം കുടുങ്ങി. ഈ മാസം മൂന്നിന് കൊച്ചിയിൽ നിന്ന് പുറപ്പെട്ട 38 അംഗ മലയാളി തീർത്ഥാടക സംഘമാണ് ഇസ്രയേലിൽ കുടുങ്ങിയത്. ഈജിപ്തിലേക്കുള്ള ഇവരുടെ യാത്ര ഇസ്രേയേലിൽ എത്തിയപ്പോൾ ഹമാസ് ആക്രമണമുണ്ടാകുകയും ഇവർ തിരികെ വരാനാകാതെ കുടുങ്ങിപ്പോകുകയുമായിരുന്നു. നിലവിൽ ബത്‌ലഹേമിലെ പാരഡൈസ് ഹോട്ടലിലാണ് ഇവരുള്ളത്.

ആദ്യത്തെ മൂന്ന് ദിവസം യാതൊരു പ്രശ്നവുമില്ലായിരുന്നുവെന്നും ഇന്നലെയാണ് പ്രശ്നം തുടങ്ങിയതെന്നും ടൂർ ഓപ്പറേറ്റർ മനു പറഞ്ഞു. അതിർത്തിയും വിമാനത്താവളവുമെല്ലാം ബ്ലോക്ക് ആയതുകൊണ്ട് എങ്ങോട്ടും നീങ്ങാൻ പറ്റാത്ത സ്ഥിതിയാണ്. ഇന്ത്യൻ എംബസിയുമായും അവിടെയുള്ള ടൂറിസം ഡിപ്പാർട്ട്മെൻറുമായും ബന്ധപ്പെട്ടിട്ടുണ്ട്. വിവരമൊന്നും ലഭിച്ചിട്ടില്ലെന്ന് അദ്ദേഹം പറഞ്ഞു.

ജറുസലേമിൽ ഇന്നലെ കുർബാനയ്ക്ക് പോയ സമയത്ത് അവിടെ ഷെല്ലാക്രമണം ഉണ്ടായിരുന്നു. പക്ഷെ സംരക്ഷണം ലഭിച്ചു. ഭക്ഷണം, താമസം തുടങ്ങിയ കാര്യങ്ങൾക്കൊന്നും പ്രയാസം വന്നിട്ടില്ല. എല്ലാവരും സുരക്ഷിതരാണെന്ന് മനു പറഞ്ഞു.

ഇസ്രയേൽ- ഹമാസ് സംഘർഷം പശ്ചിമേഷ്യയെ ഉലയ്ക്കുമ്പോൾ ഇസ്രയേലിൽ കുടുങ്ങിയ ഇന്ത്യക്കാരുടെ കാര്യത്തിൽ വിദേശകാര്യ മന്ത്രാലയം അതീവജാഗ്രത തുടരുകയാണ്. അനാവശ്യ യാത്രകൾ ഒഴിവാക്കണമെന്നും സുരക്ഷിത സ്ഥാനങ്ങളിൽ തുടരണമെന്നും പൗരന്മാർക്ക് ഇന്ത്യ നിർദേശം നൽകി. പലസ്തീനിലെ ഇന്ത്യൻ പൗരന്മാർക്ക് ബന്ധപ്പെടാനും എംബസി ഹെൽപ് ഡെസ്‌ക് ആരംഭിച്ചിട്ടുണ്ട്. അടിയന്തര ആവശ്യങ്ങൾക്ക് 0592916418 എന്ന നമ്പരിൽ ബന്ധപ്പെടാമെന്നും ഇന്ത്യൻ എംബസി അറിയിച്ചു. ഇസ്രായേലിലുള്ള ഇന്ത്യൻ പൗരന്മാർക്ക് അടിയന്തര ആവശ്യങ്ങൾക്ക് +97235226748 എന്ന നമ്പരിൽ ബന്ധപ്പെടാം.