44 കോടിയുടെ സ്റ്റേഡിയം ജല്ലിക്കെട്ടിനു വേണ്ടി തമിഴ്നാട്ടിൽ ഒരുങ്ങുന്നു, ഉദ്ഘാടനം ജനുവരി 15ന്

പരമ്പരാഗതമായി തമിഴ്നാട്ടിലെ ജനങ്ങൾ കൊണ്ടാടുന്ന വിനോദമായ ജല്ലിക്കെട്ടിനു അളകാനല്ലൂർ പ്രത്യേക സ്റ്റേഡിയം ഒരുങ്ങുന്നു. 66 ഏക്കർ സ്ഥലത്ത് 44.60 കോടി രൂപ ചെലവഴിച്ചാണു തമിഴ്നാട് സർക്കാർ സ്റ്റേഡിയം നിർമിക്കുന്നത്. ഡിണ്ടിഗൽ – മധുര ഹൈവേയിൽ വാടിപ്പട്ടിയിൽ നിന്ന് ഇടത്തേക്കു തിരിഞ്ഞ് ഈ ഗ്രാമത്തിലെത്താം.

ഹൈവേയിൽ നിന്നു സ്റ്റേഡിയം സ്ഥിതി ചെയ്യുന്ന സ്ഥലത്തേക്കുള്ള റോഡിന് 22 കോടിയും മുടക്കുന്നുണ്ട്. മധുര ജില്ലയിലെ അളകാനല്ലൂരിനു സമീപമുള്ള കീഴക്കരൈ ഗ്രാമത്തിലാണു സ്റ്റേഡിയം ഒരുങ്ങുന്നത്. നിർമാണം ഡിസംബർ അവസാനത്തോടെ പൂർത്തിയാക്കാൻ രാപകൽ ജോലികൾ നടക്കുകയാണ്. ഇത്തവണ ജല്ലിക്കെട്ട് നടക്കുന്ന ജനുവരി 15നു മുഖ്യമന്ത്രി എം.കെ.സ്റ്റാലിൻ സ്റ്റേഡിയത്തിന്റെ ഉദ്ഘാടനം നിർവഹിച്ചേക്കും.

തമിഴ്നാടിന്റെ പൈതൃക കായികമത്സരമായ ജല്ലിക്കെട്ടിലേക്കു കൂടുതൽ ആളുകളെ ആകർഷിക്കാൻ പ്രത്യേക പരിപാടികൾ തയാറാക്കുമെന്നു സ്റ്റേഡിയം നിർമാണം വിലയിരുത്താനെത്തിയ മന്ത്രിമാരായ എ.വി.വേലു, പി.മൂർത്തി എന്നിവർ പറഞ്ഞു.