റേഷൻ കടയിൽ സാധനങ്ങൾ വാങ്ങാൻ എത്തിയത് അരലക്ഷം പേർ

തിരുവനന്തപുരം ∙ പൊതു പണിമുടക്കിന് ആദ്യദിനമായ തിങ്കളാഴ്ച അര ലക്ഷത്തിലേറെ പേർ റേഷൻകടകളിൽ സാധനങ്ങൾ വാങ്ങാൻ എത്തി. ഏഴായിരത്തോളം റേഷൻ കടകൾ പ്രവർത്തിച്ചതായാണ് അനൗദ്യോഗിക കണക്കുകൾ പുറത്ത് വരുന്നത്.

പണിമുടക്കിൽ പങ്കെടുക്കാത്ത റേഷൻ വ്യാപാരികളുടെ പ്രധാന സംഘടനകളിലെ അംഗങ്ങൾ കടകൾ തുറന്നതോടെയാണു സംസ്ഥാനത്തെ പകുതിയോളം കടകൾ പ്രവർത്തിച്ചത്. ഇവയിൽ നിന്നായി 59,691 കാർഡ് ഉടമകളാണു റേഷൻ വാങ്ങിയത്. ഇതോടെ 92.19 ലക്ഷം കാർഡ് ഉടമകളിൽ 60.28 ലക്ഷം പേർ (65.38%) ഈ മാസം ഇതുവരെ റേഷൻ വിഹിതം കൈപ്പറ്റി.

പണിമുടക്കു മൂലം കടകൾ തുറക്കാൻ കഴിയാത്ത സാഹചര്യം ഉണ്ടാകുമെന്നതു പരിഗണിച്ച് ഞായറാഴ്ച പ്രവൃത്തിദിനമാക്കിയപ്പോൾ 2.47 ലക്ഷം പേർ റേഷൻ വാങ്ങിയിരുന്നു. പതിനാലായിരത്തോളം കടകളിൽ രണ്ടായിരത്തിൽപ്പരം കടകൾ റേഷൻ വ്യാപാരികളുടെ രണ്ടു സംഘടനകൾ പ്രഖ്യാപിച്ച സമരം കാരണം തുറന്നില്ല. പ്രവർത്തിക്കാത്ത കടകളുടെ വിവരം ശേഖരിക്കുന്നതായി മന്ത്രി ജി.ആർ.അനിൽ അറിയിച്ചിരുന്നു.