കേന്ദ്രത്തിന്റെ 60 ശതമാനം വിഹിതത്തോടെ കേരളത്തിൽ 112 ഗ്രാമീണ റോഡുകളുടെ നവീകരണത്തിന് 554.45 കോടി അനുമതി നൽകി കേന്ദ്രം

തിരുവനന്തപുരം. സംസ്ഥാനത്തെ 112 റോഡുകളുടെ നവീകരണത്തിന് കേന്ദ്ര സർക്കാരിന്റെ പിഎംജിഎസ്‌വൈ പദ്ധതിയുടെ ഭാഗമായി 554.45 കോടി രൂപയുടെ അനുമതി ലഭിച്ചെന്നു തദ്ദേശ സ്വയം ഭരണ എക്സൈസ് വകുപ്പ് മന്ത്രി എംബി രാജേഷ്. 2023-24 സാമ്പത്തിക വർഷത്തിൽ 594.75 കിലോമീറ്റര്‍ ഗ്രാമീണ റോഡ് നവീകരണമാണ് നടപ്പാക്കുക. കേന്ദ്ര-സംസ്ഥാന സംയുക്ത പദ്ധതിയിൽ 60:40 അനുപാതത്തിലാണ് ഫണ്ട് വിനിയോഗം ഉണ്ടാവുക.

328.45 കോടി രൂപ കേന്ദ്രസർക്കാരും 226 കോടി രൂപ സംസ്ഥാന സര്‍ക്കാരും 112 റോഡുകളുടെ നവീകരണത്തിന് ചെലവഴിക്കും. സംസ്ഥാന സര്‍ക്കാര്‍ സമര്‍പ്പിച്ച പ്രോജക്ട് റിപ്പോര്‍ട്ട് അംഗീകരിച്ചാണ് പി എം ജി എസ് വൈ എംപവേര്‍ഡ് കമ്മിറ്റി പദ്ധതികള്‍ക്ക് അംഗീകാരം നൽകിയിട്ടുള്ളത്. സംസ്ഥാന സര്‍ക്കാരിന് കീഴിലുള്ള കെഎസ്എസ്ആര്‍ഡിഎ ആണ് പദ്ധതിയുടെ നിര്‍വഹണ ഏജൻസിയായി പ്രവർത്തിക്കുന്നത്.

കൊല്ലം 3, കോഴിക്കോട് 11, ആലപ്പുഴ 1, പത്തനംതിട്ട 4, തിരുവനന്തപുരം 8, കോട്ടയം 13, ഇടുക്കി 13, എറണാകുളം 9, തൃശൂര്‍ 7, പാലക്കാട് 8, മലപ്പുറം 14, വയനാട് 5, കണ്ണൂര്‍ 8, കാസര്‍ഗോഡ് 8 റോഡുകളാണ് പുതുതായി അനുവദിച്ചത്. സംസ്ഥാനത്താ കെ 1778 റോഡുകളും നാല് പാലങ്ങളുമാണ് പിഎംജിഎസ് വൈയുടെ ഭാഗമായി നിർമ്മിച്ചു വരുന്നത്.

മൊത്തം 5172.24 കോടിയാണ് പദ്ധതി തുക. ഇതിൽ 3597 കോടി രൂപയുടെ പദ്ധതികള്‍ പൂർത്തിയായതായാണ് മന്ത്രി അവകാശപ്പെടുന്നത്. 1512 റോഡുകളുടെയും രണ്ട് പാലത്തിന്റെയും പണി ഇതിനകം പൂർത്തിയാഎന്നും അവകാശപ്പെടുന്നുണ്ട്. പുതുതായി അനുവദിച്ചത് ഉള്‍പ്പെടെ 266 റോഡുകളുടെയും രണ്ട് പാലങ്ങളുടെയും നിർമ്മാണം ഇനി പൂർത്തിയാക്കാനുണ്ട്. സമയബന്ധിതമായി പ്രവർത്തനം പൂർത്തിയാക്കാനുള്ള ശ്രമം അതിവേഗം തുടരുമെന്നാണ് മന്ത്രി എംബി രാജേഷ് പറയുന്നത്.