ആൺകുട്ടിയെ 2 വർഷത്തോളം പീഡിപ്പിച്ച 67കാരൻ അറസ്റ്റിൽ

പ്ലസ് വൺ വിദ്യാർഥിയെ ലൈംഗിക പീഡനത്തിന് ഇരയാക്കിയ 67കാരൻ പിടിയിൽ. കൊല്ലം കുമ്മിളിൽ ഐരകുഴി സ്വദേശി ഗോപിനാഥൻ പിളളയാണ് അറസ്റ്റിലായത്.

2022 മുതൽ ആൺകുട്ടിയെ തുടർച്ചയായി പീഡിപ്പിക്കുകയായിരുന്നുവെന്നാണ് പരാതി. കുട്ടിയെ പ്രലോഭിപ്പിച്ചും ഭീഷണിപെടുത്തിയുമായിരുന്നു ലൈംഗിക പീഡനം. കുട്ടിയുടെ വീടുമായുള്ള അടുപ്പം മുതലെടുത്ത് ഗോപിനാഥൻ പിള്ള നിരവധി തവണ പീഡനം തുടർന്നു. പ്രതിയുടെ വീട്ടിൽ വച്ചും പീഡനമുണ്ടായി.

നിരന്തരമായ പീഡനത്തെതുടർന്നു കുട്ടിയുടെ പെരുമാറ്റത്തിൽ മാറ്റം വന്നു. ആരോടും അധികമൊന്നും മിണ്ടാതായി. പുറത്തിറങ്ങാനും ഭയപ്പെട്ടു. സ്വഭാവത്തിലെ മാറ്റം ശ്രദ്ധയിൽപെട്ട ബന്ധുകൾ കാര്യം തിരക്കിയെങ്കിലും കുട്ടി ഒന്നും പറയാൻ തയ്യാറായില്ല.

കൗൺസിലിങ്ങിൽ പീഡന വിവരം പറയുകയായിുരന്നു. തുടർന്നു കുട്ടിയുടെ മാതാപിതാക്കൾ കടക്കൽ പോലീസിൽ പരാതി നൽകി. കുട്ടിയുടെ മൊഴി എടുത്ത പോലീസ് പോക്‌സോ, ഭീഷണിപ്പെടുത്തൽ തുടങ്ങിയ വകുപ്പുകൾ ചുമത്തി പ്രതിയെ അറസ്റ്റ് ചെയ്തു. പ്രതിയെ കോടതി റിമാൻഡ് ചെയ്തു.