അപകടത്തിന് തൊട്ടുമുമ്പ് നടത്തിയ സർവീസിൽ ബോട്ടിലുണ്ടായിരുന്നത് 70പേർ , പരസ്യമായ നിയമലംഘനം

താനൂർ: താനൂർ ഒട്ടുംപുറം തൂവൽതീരം ബീച്ചിൽ വിനോദ ബോട്ട് സ‌ർവീസ് നടത്തിയിരുന്നത് പരസ്യമായ നിയമലംഘനത്തോടെ. അ‌ഞ്ചു മണിവരെ മാത്രമേ ബോട്ട് സർവീസിന് അനുമതിയുള്ളൂ. എന്നാൽ അവധി ദിവസങ്ങളിൽ ആറു മണിക്കുശേഷവും സർവീസ് തുടരും. അനുവദനീയമായതിലും അധികം യാത്രക്കാരെ കയറ്റിയാണ് യാത്ര. ബോട്ടിൽ മതിയായ ലൈഫ് ജാക്കറ്റ് ഉൾപ്പെടെയുള്ള സുരക്ഷാസംവിധാനങ്ങൾ ഇല്ല.

23 പേരുടെ മരണത്തിനിടയാക്കിയ അപകടത്തിന് തൊട്ട് മുൻപ് നടന്ന സർവീസിൽ ബോട്ടിലുണ്ടായിരുന്നത് 70 പേരാണ്. 21 മാത്രം കയറാൻ പാടുള്ളൂവെന്നിരിക്കെയാണ് ഇത്രയുമധികം പേർ ബോട്ടിൽ കയറിയത്. പണം കിട്ടുക എന്ന ഒറ്റ ലക്ഷ്യം മാത്രമാണ് ഇതിനുള്ളത്. ജില്ലാ ടൂറിസം പ്രമോഷൻ കൗൺസിന്റെ മേൽനോട്ടത്തിൽ സ്വകാര്യ കമ്പനികളാണ് താനൂർ ഒട്ടുംപുറം തൂവൽതീരം ബീച്ചിൽ വിനോദ ബോട്ട് സ‌ർവീസ് നടത്തുന്നത്. എന്നാൽ നിയമങ്ങൾ പാലിച്ചുകൊണ്ടാണോ ഇതെന്നാണ് പരിശോധിക്കേണ്ടത്.

ബോ‌ട്ട് ഇടതുവശം ചരിഞ്ഞ് കുറച്ചുസമയം ചെളിയിൽ പൂണ്ടുനിന്നു. പിന്നാലെ മുഴുവനായി കീഴ്മേൽ മറിഞ്ഞു. തൊട്ടുപിറകിൽ വരികയായിരുന്ന ചെറിയ ഹൗസ് ബോട്ടിലെ ജീവനക്കാർ അപകടം കണ്ടതോടെ വേഗത്തിൽ കരയിലേക്ക് തിരിച്ച് യാത്രക്കാരെ ഇറക്കിയ ശേഷം മടങ്ങിവന്നു. 10 മിനിട്ടിനു ശേഷമാണ് രക്ഷാപ്രവർത്തനം തുടങ്ങാനായത്. ബോട്ടിലുണ്ടായിരുന്നവരുടെ ബഹളം കേട്ട് ചെറുതോണികളിലായി മത്സ്യതൊഴിലാളികളെത്തി. ബോട്ടിലുണ്ടായിരുന്ന റെസ്ക്യു ജീവനക്കാരും ആളുകളെ തോണികളിൽ കയറ്റി. ഒരുപക്ഷെ അപകടം ആരും കണ്ടിരുന്നില്ലെങ്കിൽ സ്ഥിതി ഇതിലും വഷളായേനെ.