5000 രൂപക്ക് 5 ദിവസത്തേക്ക് കരാർ വ്യവസ്ഥയിൽ ഭാര്യയായി അഭിനയിക്കാൻ യുവാവിനൊപ്പം പോയ സീരിയൽ നടി, രക്ഷപെടാൻ പോലീസ് സഹായം തേടി രക്ഷപെട്ടു

മുംബൈ . അയ്യായിരം രൂപയ്ക്ക് അഞ്ചു ദിവസത്തേക്ക് കരാർ വ്യവസ്ഥ പറഞ്ഞു ഭാര്യയായി അഭിനയിക്കാൻ യുവാവിനൊപ്പം പോയ സീരിയൽ നടിയെ ഒടുവിൽ പൊലീസ് എത്തി രക്ഷിക്കേണ്ടി വന്നു. സംഭവം അഭിനയമല്ലെന്നും നടന്നത് യഥാർഥ വിവാഹമാണെന്നും ആറാം ദിവസം യുവാവ് പറഞ്ഞതോടെയാണ് താൻ കുടുങ്ങിയതാണെന്ന് മനസിലാക്കിയ നടി സുഹൃത്ത് വഴി പോലീസിന്റെ സഹായം തേടാൻ ഇടയാക്കിയത്. തന്റെ സുഹൃത്തിനെ യുവതി വിവരം അറിയിക്കുകയും പൊലീസെത്തി നടിയെ മോചിപ്പിക്കുകയുമാണ് പിന്നീട് ഉണ്ടായത്.

നടിയുടെ സുഹൃത്ത് ആയിഷയുടെ ഭർത്താവ് കരൺ മുഖേനയാണ് 21 വയസ്സുകാരിയായ നടിക്ക് മുകേഷ് എന്നയാളുടെ ഭാര്യയായി അഞ്ച് ദിവസം അഭിനയിക്കാൻ അവസരം ഉണ്ടാക്കുന്നത്. മുകേഷിന്റെ വീട്ടുകാരെ വിശ്വസിപ്പിക്കാൻ ഭാര്യയായി അഭിനയിക്കണമെന്ന് കരൺ ആവശ്യപ്പെടുകയാ യിരുന്നു. ഇതിനായി 5,000 രൂപയും വാഗ്ദാനം ചെയ്തിരുന്നു. മാർച്ച് 12ന്, കരണും യുവതിയും മധ്യപ്രദേശിലെ മന്ദ്‌സൗർ ഗ്രാമത്തിലെത്തുക യായിരുന്നു. അവിടെ വച്ച് ആണ് കരണിന്റെ പരിചയക്കാരനായ മുകേഷിനെ കാണുന്നത്.

വീട്ടുകാരുടെ മുന്നിൽ ഭാര്യയായി അഭിനയിക്കണമെന്ന ആവശ്യം യുവതി അംഗീകരിക്കുകയും മുകേഷിന്റെ കുടുംബത്തോടൊപ്പം ഒരു ക്ഷേത്രത്തിൽ വച്ച് വിവാഹിതരാവുകയും ചെയ്തു. നടി തുടർന്ന് കരാർ പ്രകാരം മുകേഷിനൊപ്പം വീട്ടിലായിരുന്നു താമസിച്ചത്. ആറാം ദിവസം യുവതി മടങ്ങി പോകണമെന്ന് ആവശ്യപ്പെട്ടു. എന്നാല്‍, ഇത് യഥാർഥ വിവാഹമാണെന്നും കരണിന് വിവാഹത്തിനായി പണം നൽകിയെന്നും പറഞ്ഞ് മുകേഷ് യുവതിയെ വിട്ടയക്കാൻ കൂട്ടാക്കിയില്ല.

താൻ കുടുങ്ങിയതാണെന്ന് തിരിച്ചറിഞ്ഞ യുവതി മുംബൈയിലുള്ള സുഹൃത്തിനെ വിവരം അറിയിക്കുകയായിരുന്നു. തുടർന്ന് സുഹൃത്ത് ആവട്ടെ ധാരാവി പൊലീസിനെ വിവരം അറിയിച്ചു. പൊലീസെത്തി യുവതിയെ സുരക്ഷിതമായി മുംബൈയിലേക്ക് തിരികെ എത്തിച്ചു. മുകേഷ്, യുവതിയുടെ സുഹൃത്ത് ആയിഷ, അവരുടെ ഭർത്താവ് കരൺ എന്നിവർക്കായി പോലീസ് ഇപ്പോൾ തിരച്ചിൽ നടത്തി വരുകയാണ്. ഇവർ മൂന്നു പേരും പൊലീസ് ഇടപെട്ടതറിഞ്ഞു മുങ്ങിയിരിക്കുകയാണ്.