വിദേശ യൂട്യൂബര്‍ക്ക് നേരെ മുംബൈയില്‍ യുവാവിന്റെ അതിക്രമം

മുംബൈ. ദക്ഷിണ കൊറിയയില്‍നിന്നുള്ള യൂട്യൂബര്‍ക്കു നേരെ മുംബൈയിലെ തെരുവില്‍ യുവാവിന്റെ അതിക്രമം. ബുധനാഴ്ച വൈകിട്ടാണ് സംഭവം. ഇതിന്റെ വിഡിയോ ട്വിറ്ററില്‍ പ്രചരിക്കുന്നുണ്ട്. മുംബൈയില്‍ വച്ച് ലൈവ് വിഡിയോ എടുത്തിരുന്ന യുവതിയുടെ കയ്യില്‍ ഒരാള്‍ കയറിപ്പിടിക്കുന്നതാണ് വിഡിയോ. മ്യോചി എന്ന യുവതിയുടെ നേര്‍ക്കാണ് അക്രമം ഉണ്ടായതെന്ന് പിന്നീട് അവര്‍ സമൂഹമാധ്യമത്തിലൂടെ സ്ഥിരീകരിച്ചു.

സംഭവത്തില്‍ സമൂഹമാധ്യമങ്ങളില്‍ വന്‍ പ്രതിഷേധം നടക്കുന്നു. ആയിരത്തിലധികം പേരാണ് യുവതിയുടെ ലൈവ് കണ്ടുകൊണ്ടിരുന്നത്. ഇവരെല്ലാം ഈ ആക്രമണം തല്‍സമയം കാണുകയും ചെയ്തു. സബേര്‍ബന്‍ ഖാര്‍ മേഖലയില്‍ രാത്രി എട്ടു മണിയോടെയായിരുന്നു സംഭവം. ലൈവ് വിഡിയോ ചെയ്തിരുന്ന യുവതിയോട് ലിഫ്റ്റ് വാഗ്ദാനം ചെയ്താണ് യുവാവ് സമീപിക്കുന്നത്.

പ്രതിഷേധിച്ചിട്ടും യുവതിയുടെ കയ്യില്‍ക്കയറി പിടിക്കുന്നതും ദൃശ്യങ്ങളില്‍ കാണാം. യുവാവ് അടുക്കാന്‍ ശ്രമിക്കുമ്പോള്‍ ശാന്തതയോടെ സ്ഥലത്തുനിന്ന് യുവതി പോകാന്‍ ശ്രമിക്കുന്നുണ്ട്. പിന്നാലെ മറ്റൊരാള്‍ക്കൊപ്പം ബൈക്കിലെത്തിയ യുവാവ് വീണ്ടും ലിഫ്റ്റ് വാഗ്ദാനം ചെയ്യുന്നു. ഇതിനോട് എന്റെ വീട് അടുത്തുതന്നെയാണെന്ന മറുപടി യുവതി നല്‍കുന്നുണ്ട്. പരാതി ലഭിച്ചിട്ടില്ലെന്ന് മുംബൈ പൊലീസ് അറിയിച്ചു. എന്നാല്‍ സംഭവം അന്വേഷിക്കുന്നുണ്ടെന്ന് പോലീസ് വ്യക്തമാക്കി.