അമ്മയെ വിവാഹം കഴിപ്പിച്ച് താരമായി ആരതി

സമൂഹമാദ്ധ്യമങ്ങളിലൂടെ സ്വന്തം വിവാഹ ചിത്രങ്ങൾ പങ്കുവെച്ച് ആഘോഷമാക്കുന്നവരാണ് അധികവും. എന്നാൽ ഇതാ സ്വന്തം അമ്മയുടെ പുനർ വിവാഹം ആഘോഷമാക്കിയിരിക്കുകയാണ് ഒരു യുവതി. സോഷ്യൽ മീഡിയയിൽ ഷില്ലോംഗ് സ്വദേശിയായ ദേവ് ആരതി റിയ ചക്രവർത്തി എന്ന യുവതി, അൻപതുകാരിയായ തന്റെ അമ്മയുടെ വിവാഹം നടത്തിക്കൊടുത്ത് താരമായിരിക്കുകയാണ്.

ആരതിയ്ക്ക് രണ്ട് വയസ്സ് പ്രായമുള്ളപ്പോഴാണ് ഡോക്ടറായ അച്ഛൻ മരണപ്പെടുന്നത്. മസ്തിഷ്ഘാതത്തെ തുടർന്നായിരുന്നു മരണം. പിന്നീട് ആരതിയെ വളർത്തിയതും പഠിപ്പിച്ചതും എല്ലാം അമ്മ മൗഷ്മ ചർക്രവർത്തി ഒറ്റയ്ക്ക് കഷ്ടപ്പെട്ടായിരുന്നു. ഒരുപാട് പോരാടിയാണ് തന്നെ വളർത്തിയതെന്ന് ദേവ് ആരതി റിയ ചക്രവർത്തി പറയുന്നു. ഭർത്താവ് മരിക്കുമ്പോൾ മൗഷ്മിയ്ക്ക് 25 വയസ്സ് മാത്രമെ പ്രായം ഉണ്ടായിരുന്നുള്ളൂ.

ബംഗാൾ സ്വദേശിയായ സ്വപാൻ ആണ് മൗഷ്മിയുടെ വരൻ. സ്വപാന്റെ ആദ്യ വിവാഹമാണിത്. ഇരുവരും സമപ്രായക്കാരുമാണ്. മാസങ്ങൾക്ക് മുൻപ് മൗഷ്മിയുടേയും സ്വപാന്റേയും വിവാഹം നടക്കുന്നത്. ഇപ്പോഴാണ് ഇവരുടെ കഥ സോഷ്യൽ മീഡിയയിൽ വൈറലായിരിക്കുന്നത്. വിവാഹത്തിനായി അമ്മയെ സമ്മതിപ്പിക്കാൻ ഒരുപാട് സമയമെടുത്തതായി ആരതി പറയുന്നുണ്ട്.

താൻ വിവാഹിതയായി പോയാൽ, അമ്മയ്ക്ക് ആരാണുണ്ടാവുക എന്ന ചിന്ത ഏതോ പ്രായം മുതൽ തന്നെ അലട്ടിയിരുന്നുവെന്ന് ആരതി ചിത്രം പങ്കുവെച്ച് കുറിച്ചിരിക്കുന്നു. സ്വപാന്റെ കാര്യത്തിൽ തന്നെ ഞാൻ ആദ്യം ആവശ്യപ്പെട്ടത് വെറുതെ ചാറ്റ് ചെയ്യാനും സംസാരിക്കാനുമാണ്. അവർ നല്ല സുഹൃത്തുക്കളായി എന്ന് മനസിലാക്കിയപ്പോൾ, അതേ സൗഹൃദം ജീവിതത്തിലേക്ക് കൂടി പകർന്നാലെന്താണ് എന്ന് ആരതി അമ്മയോട് ചോക്കുകയായിരുന്നു. അങ്ങനെയാണ് തന്റെ നിർബന്ധത്തെ തുടർന്ന് വിവാഹം നടന്നതെന്നും ആരതി പറയുന്നു.