ദേശീയ മുസ്ലീം എന്നു പറഞ്ഞതിന് തന്നെ ട്രോളിയവര്‍ ദേശീയ പുഷ്പം താമരയാണെന്ന് മറന്നെന്നും അബ്ദുള്ളക്കുട്ടി

ദേശീയ മുസ്ലീം എന്നു പറഞ്ഞതിന് തന്നെ ട്രോളിയവര്‍ ദേശീയ പുഷ്പം താമരയാണെന്ന് മറന്നെന്നും ഇനി താമരക്കാലമാണെന്നും എ പി അബ്ദുല്ലക്കുട്ടി. മാത്രമല്ല, എസ് എഫ് ഐ എന്നാല്‍ സ്റ്റുപ്പിഡ് ഫെഡറേഷന്‍ ഓഫ് ഇഡിയറ്റ് ആണെന്നും ഈ പഴയ എസ് എഫ് ഐ നേതാവ് പറഞ്ഞു.

എസ് എഫ് ഐക്കെതിരെ രൂക്ഷ വിമര്‍ശനമാണ് അബ്ദുല്ലക്കുട്ടി നടത്തിയത്. എസ് എഫ് ഐ ക്യാംപസുകളെ പാര്‍ട്ടി ഗ്രാമങ്ങളാക്കുന്നു. ഇവരുടെ ഉന്‍മൂലനം നടന്നില്ലെങ്കില്‍ ഭാവി അപകടത്തിലാണെന്നും അബ്ദുല്ലക്കുട്ടി പറയുന്നു. മുന്‍കാല പുണ്യം കൊണ്ടാണ് ബി ജെ പി തന്നെ സ്വീകരിച്ചതെന്നും അബ്ദുല്ലക്കുട്ടി കൂട്ടിച്ചേര്‍ത്തു. ലോകത്തെ ഏറ്റവും വലിയ ജനാധിപത്യ പാര്‍ട്ടിയാണ് ബി ജെ പി. തന്റെ രാഷ്ട്രീയ ജീവിതത്തിലെ പുനര്‍ ജന്മമാണിതെന്നും ഈ കാരുണ്യത്തിനു മുന്നില്‍ കൂപ്പുകൈയോടെ നില്‍ക്കുന്നുവെന്നും ഏകാത്മക മാനവ ദര്‍ശനംപോലെ ഗാന്ധി ദര്‍ശനവും ബി ജെ പി ഉയര്‍ത്തിപ്പിടിക്കുന്നതായും അദ്ദേഹം വ്യക്തമാക്കി.

നരേന്ദ്ര മോഡിയുടെ ഗുജറാത്തില്‍ ഒരു സംരംഭകനും ആത്മഹത്യ ചെയ്യേണ്ടി വന്നിട്ടില്ല. രണ്ടാം മോഡി സര്‍ക്കാരിന്റെ ബജറ്റ് ഗാന്ധിക്ക് പ്രാമുഖ്യം നല്‍കിയ ബജറ്റായിരുന്നു. ദേശീയ മുസ്ലീം എന്നു പറഞ്ഞതിന് തന്നെ ട്രോളിയവര്‍ ദേശീയ പുഷ്പം താമരയാണെന്ന് മറന്നെന്നും ഇനി താമരക്കാലമാണെന്നും അബ്ദുല്ലക്കുട്ടി കൂട്ടിച്ചേര്‍ത്തു.

മോഡി വീണ്ടും അധികാരത്തില്‍ വന്നാല്‍ നമ്മുടെ ജഡം കത്തിക്കില്ലേ എന്ന് ഉമ്മ തന്നോട് ചോദിച്ചുവെന്നും, ഇത്തരം കള്ളപ്രചാരണമാണ് ഇടതു വലതു മുന്നണികള്‍ മുസ്ലീം സമുദായത്തിനിടയില്‍ നടത്തിയത്. സിപിഎം പാര്‍ട്ടി ഗ്രാമത്തില്‍ മാത്രമാണ് ഇത്തരം കാര്യങ്ങള്‍ നടക്കുന്നതെന്നും കേരളവും ബിജെപിക്ക് അനുകൂലമായി കലങ്ങിത്തെളിയുമെന്നും അദ്ദേഹം പറഞ്ഞു.