മൂന്നാമതും മോദി അധികാരത്തിൽ എത്തും, മോദി ഭരണത്തില്‍ ജനം സന്തുഷ്ടര്‍, എബിപി- സീ വോട്ടർ സർവെ റിപ്പോര്‍ട്ട്

ന്യൂഡൽഹി : 2024ലെ ലോക്‌സഭ തെരഞ്ഞെടുപ്പില്‍ മോദിയുടെ നേതൃത്ത്വം നയിക്കുന്ന ബിജെപി സര്‍ക്കാര്‍ തന്നെ അധികാരത്തിലേറുമെന്ന് സര്‍വേ റിപ്പോര്‍ട്ട്. ബിജെപി നയിക്കുന്ന എന്‍ഡിഎയ്‌ക്ക് ഏകദേശം 295-335 സീറ്റുകള്‍ ലഭിക്കുമെന്നും പ്രതിപക്ഷമായ കോണ്‍ഗ്രസിനും അതിന്റെ ഇന്‍ഡി സഖ്യകക്ഷികള്‍ക്കും 165-205 സീറ്റുകള്‍ ലഭിക്കുമെന്നും പ്രവചിച്ച് എബിപി ന്യൂസും സിവോട്ടറും നടത്തിയ സര്‍വേ.

28 പാർട്ടികൾ ചേർന്നുള്ള ഇൻഡി സഖ്യത്തിന് 165 മുതൽ 205 വരെ സീറ്റുകൾ മാത്രമേ നേടാൻ സാധിക്കുകയുള്ളു. രാജ്യത്തിന്റെ കിഴക്ക്, വടക്ക്, പടിഞ്ഞാറൻ മേഖലകളിൽ ബിജെപിയും സഖ്യകക്ഷികളും നേട്ടം കൊയ്യുമ്പോൾ തെക്കൻ മേഖലയിൽ മാത്രമാകും ഇൻഡി സഖ്യത്തിന് പിടിച്ചു നിൽക്കാൻ സാധിക്കുകയെന്നും സർവെ വ്യക്തമാക്കുന്നു.

ഇന്ത്യയുടെ വടക്കൻ മേഖലയിൽ ബിജെപി 150 മുതൽ 160 സീറ്റുകൾ വരെ നേടും. 20 മുതൽ 30 വരെ സീറ്റുകൾ മാത്രമാണ് മേഖലയിൽ നിന്നും ഇൻഡി മുന്നണിക്ക് നേടാൻ സാധിക്കുക. 5 സീറ്റുകൾ വരെ മറ്റുള്ളവരും നേടും. 50 ശതമാനം പേരും എൻഡിഎയെ പിന്തുണയ്‌ക്കുമ്പോൾ 36 ശതമാനം വോട്ട് ഇൻഡി മുന്നണിക്ക് ലഭിക്കും.

എബിപി ന്യൂസ് സി-വോട്ടര്‍ അഭിപ്രായ വോട്ടെടുപ്പ് 2024ല്‍ മോദി സര്‍ക്കാരിന്റെ തിരിച്ചുവരവ് പ്രവചിക്കുന്നു, എന്നാല്‍ സൗത്ത് ഇന്ത്യ എന്‍ഡിഎയ്‌ക്ക് (നാഷണല്‍ ഡെമോക്രാറ്റിക് അലയന്‍സ്) ഒരു വെല്ലുവിളിയായി തുടരുകയാണെന്നും പറയുന്നു. രാജ്യത്തൊട്ടാകെയുള്ള 18ലധികം മുതിര്‍ന്നവര്‍ക്കിടയില്‍ ഡിസംബര്‍ 15 മുതല്‍ ഡിസംബര്‍ 21 വരെ നടത്തിയ സി-വോട്ടര്‍ അഭിപ്രായ വോട്ടെടുപ്പിന്റെ കണ്ടെത്തലുകളും പ്രവചനങ്ങളുമാണിത്. 543 സീറ്റുകളില്‍ 13,115 പേരില്‍ നടത്തിയ സര്‍വേയുടെ ഫലമാണിതെന്ന് പ്രസ്താവന വ്യക്തമാക്കുന്നു.

കേരളം ഉൾപ്പെടുന്ന തെക്കൻ മേഖലയിൽ ഇൻഡി മുന്നണിക്കാണ് മേൽക്കൈ. 70 മുതൽ 80 സീറ്റുകൾ മുന്നണിക്ക് തെക്കൻ മേഖലയിൽ നിന്നും ലഭിക്കും. 20 മുതൽ 30 സീറ്റുകൾ വരെയാണ് എൻഡിഎയ്‌ക്ക് സർവെ പ്രവചിക്കുന്നത്. മുന്നണിയിൽ ഉൾപ്പെടാത്ത മറ്റുപാർട്ടികൾ 25 മുതൽ 35 സീറ്റുകൾ വരെ സ്വന്തമാക്കും. 19 ശതമാനം വോട്ടാണ് സർവെ എൻഡിഎയ്‌ക്ക് പ്രവചിക്കുന്നത്. 40 ശതമാനം വോട്ടുകൾ ഇൻഡി മുന്നണിക്കും 41 ശതമാനം മറ്റു പാർട്ടികൾക്കും ലഭിക്കും.

ഭാരതത്തിന്റെ കിഴക്കൻ മേഖലയിലും ബിജെപിക്ക് തന്നെയാണ് മേൽക്കൈ. 80 മുതൽ 90 സീറ്റുകൾ വരെ ബിജെപി സഖ്യം സ്വന്തമാക്കും. 42 ശതമാനം വോട്ടും നേടും. ഇൻഡി സഖ്യം 50 മുതൽ 60 വരെയും മറ്റുള്ളവർ 20 സീറ്റുകൾ വരെയും നേടും. 38 ശതമാനം വോട്ടാണ് മേഖലയിൽ ഇൻഡി മുന്നണിക്ക് പ്രവചിക്കുന്നത്. 20 ശതമാനം പേർ പ്രാദേശിക പാർട്ടികളെയും പിന്തുണയ്‌ക്കും.