ഭർത്താവിനൊപ്പം സ്കൂട്ടറിൽ യാത്ര ചെയ്യവേ ടിപ്പർ ലോറി ഇടിച്ച് വീട്ടമ്മ മരിച്ചു

തിരുവനന്തപുരം. ഭർത്താവിനൊപ്പം സ്കൂട്ടറിൽ യാത്ര ചെയ്യവേ ടിപ്പർ ലോറി ഇടിച്ച് വീട്ടമ്മ മരിച്ചു. ചാല കരിമഠം സ്വദേശി ലേഖ (45) ആണ് മരിച്ചത്. അപകടത്തിൽ പരിക്കേറ്റ ഭർത്താവ് കുമാർ പിആർഎസ് ആശുപത്രിയിൽ ചികിത്സയിലാണ്.

മകന്റെ വിവാഹം ക്ഷണിക്കാൻ പോകുന്നതിനിടയിൽ കരമന പിആർഎസ് ആശുപത്രിക്ക് സമീപം ഇന്ന് മൂന്നരയോട് കൂടിയാണ് അപകടം നടന്നത്.
പള്ളിച്ചലിലേക്ക് പോകുന്ന വഴിക്കായിരുന്നു അപകടം. ആംബുലൻസിന് സൈഡ് കൊടുക്കുന്നതിനായി ടിപ്പർ ലോറി വശത്തേയ്‌ക്ക് മാറിയപ്പോൾ സ്‌കൂട്ടറിൽ ഇടിക്കുകയായിരുന്നു. ലേഖ ഹെൽമറ്റ് ധരിച്ചിരുന്നില്ലെന്നാണ് വിവരം.

അപകടത്തെത്തുടർന്ന് യുവതിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ പരിക്കേറ്റ ഭർത്താവ് കുമാർ പിആർഎസ് ആശുപത്രിയിൽ ചികിത്സയിലാണ്. അടുത്ത മാസം 18നാണ് മകന്റെ വിവാഹം നിശ്ചയിച്ചിരിക്കുന്നത്. സുനു അനു, അഞ്ചു എന്നിവരാണ് മക്കൾ.