ആശുപത്രിയിൽ വൈദ്യ പരിശോധനയ്‌ക്കായി എത്തിച്ച പ്രതി ഡോക്ടറെ ആക്രമിക്കാൻ ശ്രമിച്ചു, സംഭവം കൊല്ലത്ത്

കൊല്ലം: ആശുപത്രിയിൽ പോലീസ് വൈദ്യ പരിശോധനയ്‌ക്കായി എത്തിച്ച പ്രതി ഡോക്ടറെ കയ്യേറ്റം ചെയ്യാൻ ശ്രമിച്ചു.കൊല്ലം ജില്ലാ ആശുപത്രിയിലാണ് സംഭവം. ആയത്തിൽ സ്വദേശി വിഷ്ണുവാണ് കയ്യേറ്റശ്രമം നടത്തിയത്. പ്രതി മദ്യപിച്ച പ്രശ്നം ഉണ്ടാക്കിയതിനെ തുടർന്ന് അഞ്ചാലുംമൂട് പോലീസ് കസ്റ്റഡിയിൽ എടുക്കുകയായിരുന്നു. തുടർന്ന് കൊല്ലം ജില്ലാ ആശുപത്രിയിൽ വൈദ്യ പരിശോധനയ്‌ക്കായി എത്തിച്ചു. ഇതിനിടെ പ്രതി ഡോക്ടറെ കയ്യേറ്റം ചെയ്യാൻ ശ്രമിക്കുകയായിരുന്നു.

രണ്ട് ദിവസം മുൻപാണ് കൊല്ലത്ത് യുവ ഡോക്ടറെ കുത്തി കൊലപ്പെടുത്തിയത്. പുലർച്ചെ നാലരയോടെ വൈദ്യ പരിശോധനയ്‌ക്കായി കൊട്ടാരക്കര താലൂക്ക് ആശുപത്രിയിലെത്തിച്ച ​രോ​ഗിയുടെ കുത്തേറ്റാണ് വന്ദന ദാസ് എന്ന ഡോക്ടർ കൊല്ലപ്പെട്ടത്. ആരോഗ്യപ്രവർത്തകർക്ക് നേരെയുള്ള അതിക്രമങ്ങളിൽ കുറവ് വന്നിട്ടില്ല എന്നുവേണം ഇതിൽ നിന്ന് മനസിലാക്കാൻ.

അതേസമയം സംസ്ഥാനത്തുടനീളം ആരോഗ്യപ്രവർത്തകർക്കും ആരോഗ്യസ്ഥാപനങ്ങൾക്കിമെതിരായ ആക്രണങ്ങൾക്കുള്ള തടവിശിക്ഷ അഞ്ച് വർഷമായി ഉയർത്തിയേക്കും. ഇതിനായുള്ള കരട് ഓർഡിനൻസ് തയ്യാറാക്കാൻ ചീഫ് സെക്രട്ടറിയുടെ അദ്ധ്യക്ഷതയിൽ ചേർന്ന ഉന്നതതല യോഗം തീരുമാനാമെടുത്തു. മുൻപ് ഉണ്ടായിരുന്ന നിയമം ശക്തമല്ലെന്ന് ആരോപിച്ച് ഡോക്ടർമാരുടെ സംഘടനകൾ രംഗത്തെത്തിയിരുന്നു.