ഓർമ്മശക്തിയില്ല, കലാ​രം​ഗത്തുനിന്നും പിന്മാറേണ്ടി വന്നതോടെ വരുമാനമില്ല, രാജിവ് കളമശ്ശേരിയുടെ അവസ്ഥ ഇങ്ങനെ

രാജീവ് കളമശ്ശേരി എന്ന മിമിക്രിക്കാരനെ അറിയാത്തവർ ചുരുക്കമായിരിക്കും, കോൺഗ്രസ് നേതാവ് എകെ ആന്റണിയുടെ ഡ്യൂപ്പ് അവതരിപ്പിച്ചാണ് ശ്രദ്ധ നേടുന്നത്. മിമിക്രി-സ്റ്റേജ് ഷോകളിലെല്ലാം നിറസാന്നിധ്യമായിരുന്നു രാജീവ്. ആന്റണി മാത്രമല്ല, ഒ രാജഗോപാലും കെആർ ഗൗരിയമ്മയും ഭരത് ഗോപിയുമൊക്കെ രാജീവിൽ നിന്ന് പിറന്നിട്ടുണ്ട്. ഇപ്പോൾ പലവിധ രോ​ഗങ്ങൾക്കകപ്പെട്ടിരിക്കുകയാണ് രാജിവ്.

രാജീവിന് ജീവിതത്തിലുണ്ടായ ദുരന്തത്തെക്കുറിച്ച്‌ വെളിപ്പെടുത്തുകയാണ് മകൾ നസ്രിൻ. വാക്കുകൾ, ‘പെട്ടെന്നൊരു ദിവസം ഉപ്പയ്ക്ക് ഹാർട്ട് അറ്റാക്ക് ഉണ്ടായി. അതിനെ തുടർന്നു ഹോസ്പിറ്റൽ അഡ്മിറ്റാക്കി. ആൻജിയോപ്ലാസ്റ്റി ചെയ്യേണ്ടിവന്നു. തുടർന്നങ്ങോട്ട് ദുരന്തം ഞങ്ങളെ പിന്തുടരുകയായിരുന്നു. പിന്നീട് ഒരു ദിവസം ബാത്റൂമിൽ ചെറുതായൊന്ന് ഉപ്പ തല തട്ടി വീണപ്പോൾ അത് തങ്ങളുടെ ജീവിതത്തിലെ ഏറ്റവും വലിയ ദുരന്തമായി മാറുമെന്ന് കരുതിയില്ല. നിസ്സാരമെന്നു കരുതിയ വീഴ്ചയുടെ മുന്നോടിയായി സ്ട്രോക്ക് വന്ന് ബ്ലഡ് ക്ലോട്ടായി’.
പതിയെ ഉപ്പയുടെ ഓർമ്മകൾ മറഞ്ഞു തുടങ്ങി. പഴയതുപോലെ കൃത്യമായി ഒന്നും ഓർത്തെടുക്കാൻ പറ്റാതെയായി. വാക്കുകൾ മുറിഞ്ഞു പോകുന്നു. വാക്യങ്ങൾ ഓർമ്മയില്ല. കലാരംഗത്തു നിന്ന് പിന്മാറിയതോടെ വരുമാനവും നിലച്ചു. തുടർന്ന് ഭാര്യയും നാല് പെൺകുട്ടികളും അടങ്ങിയ കുടുംബം ജപ്തി ഭീഷണിയിലായി.

പന്ത്രണ്ടാം വയസ്സിലാണ് രാജീവ് കളമശ്ശേരി തന്റെ കലാ ജീവിതത്തിലേക്ക് കടന്നുവരുന്നത്. സ്കൂൾ നാടകങ്ങളിലൂടെയായിരുന്നു അരങ്ങേറ്റം. പിന്നീട് നിരവധി നാടകങ്ങളിൽ ബാലനടനായി അഭിനയിച്ചു. തന്റെ വഴി കലയാണെന്ന് പിന്നീട് തിരിച്ചറിയുകയായിരുന്നു അദ്ദേഹം. പിന്നീട് സിനിമകളിലേക്കും തിരിഞ്ഞു. 25 ഓളം സിനിമകളിൽ വലുതും ചെറുതുമായ വേഷങ്ങളിൽ അഭിനയിച്ചു.