സത്യന്‍ അന്തിക്കാടിന്റെ സ്ഥിരം നടന്‍; തൃശ്ശൂർ ചന്ദ്രൻ അന്തരിച്ചു

വടക്കാഞ്ചേരി: പ്രശസ്ത നാടക, സിനിമ, സീരിയൽ നടൻ തൃശ്ശൂർ ചന്ദ്രൻ (59) അന്തരിച്ചു. ‘വെനീസിലെ വ്യാപാരി’ എന്ന നാടകത്തിലെ അഭിനയത്തിന് 2002-ൽ മികച്ച നടനുള്ള സംസ്ഥാന അവാർഡ് ലഭിച്ചിരുന്നു. മുണ്ടത്തിക്കോട് പെഴുംകാട്ടിൽ നാരായണൻ നായരുടെയും പട്ട്യാത്ത് കുഞ്ഞുലക്ഷ്മി അമ്മയുടെയും മകനാണ്.

ശ്വാസസംബന്ധമായ അസുഖത്തെത്തുടർന്ന് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയായിരുന്നു മരണം. തൃശ്ശൂർ ചിന്മയ, യമുന, ഓച്ചിറ അഖില, കൊല്ലം ഐശ്വര്യ, തിരുവനന്തപുരം അതുല്യ, ഗുരുവായൂർ ബന്ധുര, കഴിമ്പ്രം തിയേറ്റേഴ്സ്, അങ്കമാലി മാനിഷാദ തുടങ്ങിയ സംഘങ്ങളുടെ നാടകങ്ങളിൽ ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്.

സത്യൻ അന്തിക്കാടിന്റെ മിക്ക സിനിമകളിലും അഭിനയിച്ച ചന്ദ്രൻ, തന്മാത്ര, പഴശ്ശിരാജ, തുടങ്ങി 20 സിനിമകളിലും നിരവധി സീരിയലുകളിലും അഭിനയിച്ചിട്ടുണ്ട്. അഞ്ജലി മേനോൻ സംവിധാനം ചെയ്ത മഞ്ചാടിക്കുരു എന്ന ചിത്രത്തിലെ വാസുദേവൻ നായർ എന്ന വേഷം ഏറെ ശ്രദ്ധേയമായിരുന്നു.

അസുഖത്തെത്തുടർന്ന് അഭിനയരംഗത്തുനിന്ന് വിട്ടുനിൽക്കുകയായിരുന്നു. രണ്ടുവർഷം മുമ്പ് മുണ്ടത്തിക്കോട് പാതിരിക്കോട്ടുകാവിലാണ് അവസാനമായി അരങ്ങിലെത്തിയത്. ഭാര്യ: വിജയലക്ഷ്മി. മക്കൾ: വിനീഷ്, സൗമ്യ. മരുമകൻ: പ്രസാദ്.