സേവ് ദി ഡേറ്റ് ചിത്രങ്ങള്‍ പങ്കുവെച്ച് നടി അനശ്വര, വിവാഹം ജൂണ്‍ നാലിന്

മലയാളികളുടെ പ്രിയപ്പെട്ട നടിയാണ് അനശ്വര പൊന്നമ്പത്ത്. ഓര്‍മ്മയില്‍ ഒരു ശിശിരം എന്ന ഒറ്റ ചിത്രത്തിലൂടെ മലയാള സിനിമയില്‍ ശ്രദ്ധിക്കപ്പെട്ട നടിയാണ് അനശ്വര. സോഷ്യല്‍ മീഡിയകളിലും ഏറെ സജീവമാണ് നടി. പുതിയ വിശേഷങ്ങളും ചിത്രങ്ങളും വീഡിയോകളും ഒക്കെ പങ്കുവെച്ച് അനശ്വര രംഗത്ത് എത്താറുണ്ട്. ഇപ്പോള്‍ ഒരു വിശേഷമാണ് നടി പങ്കുവെച്ചിരിക്കുന്നത്.

വിവാഹത്തിന് ഒരുങ്ങിയിരിക്കുകയാണ് ഇപ്പോള്‍ അനശ്വര. താരത്തിന്റെ സേവ് ദി ഡേറ്റ് ചിത്രങ്ങള്‍ സോഷ്യല്‍ മീഡിയകളില്‍ വൈറലായി കഴിഞ്ഞു. നടി തന്നെയാണ് ചിത്രങ്ങള്‍ സോഷ്യല്‍ മീഡിയകളിലൂടെ പങ്കുവെച്ചത്. ജൂണ്‍ നാലിനാണ് അനശ്വരയുടെ വിവാഹം. മറൈന്‍ എന്‍ജിനീയറായ ദിന്‍ഷിത്ത് ദിനേശ് ആണ് അനശ്വരയുടെ പ്രതിശ്രുത വരന്‍. കഴിഞ്ഞ ജൂണില്‍ ആയിരുന്നു ഇരുവരുടെയും വിവാഹ നിശ്ചയം നടന്നത്.

കലോത്സവ വേദികളില്‍ നിന്നുമാണ് അനശ്വരയും സിനിമയിലെത്തിയത്. അഞ്ച് കൊല്ലം കണ്ണൂര്‍ യൂണിവേഴ്‌സിറ്റിയുടെ കലാതിലകപ്പട്ടം ചൂടിയ കലാകാരിയാണ് അനശ്വര. ഇംഗ്ലീഷ് ബിരുദധാരിയായ അനശ്വര മികച്ചൊരു ക്ലാസിക്കല്‍ ഡാന്‍സര്‍ കൂടിയാണ്.