കറുത്തവളെന്ന് വിളിച്ച്‌ അധിക്ഷേപിക്കുന്നു, പരാതിയുമായി നടി ശ്രുതി ദാസ്

കളറിന്റെ പേരിൽ തന്നെ അപമാനിക്കുന്നുവെന്ന പരാതി നൽകി നടി ശ്രുതി ദാസ്. 2019ൽ ബംഗാളി സീരിയലായ ‘ത്രിനായനി’ലൂടെയാണ് ശ്രുതി അഭിനയ രംഗത്തേക്ക് കടക്കുന്നത്.

രണ്ട് വർഷത്തോളമായി താൻ ആക്ഷേപിക്കപ്പെടുകയാണെന്ന് നടി കൊൽക്കൊത്ത പൊലീസിന് നൽകിയ പരാതിയിൽ പറയുന്നു. അന്ന് മുതൽ താൻ നിരന്തരമായി സോഷ്യൽമീഡിയയിലൂടെ പരിഹാസത്തിന് ഇരയാവുകയാണെന്ന് ശ്രുതി പറയുന്നു. ബ്ലാക്ക് ബോർഡ്, കാളിന്ദി എന്നൊക്കെ വിളിച്ചാണ് ആക്ഷേപം. തൊലിയുടെ നിറത്തെ കുറിച്ചുള്ള ആളുകളുടെ കളിയാക്കൽ കേട്ട് മടുത്തു. താനും ഒരു മനുഷ്യനാണ്. ആക്ഷേപങ്ങൾക്കെതിരെ നിയമനടപടി സ്വീകരിക്കണമെന്ന് ഏറെനാളായി ആലോചിച്ചതാണ്. അവസാനം കഴിഞ്ഞ ദിവസം പൊലീസിൽ പരാതി നൽകിയെന്നും നടി പറഞ്ഞു.

ആദ്യമൊക്കെ കളിയാക്കൽ ട്രോളുകളെ താൻ അവഗണിച്ചിരുന്നുവെന്നും എന്നാൽ ഓരോ ദിവസം കഴിയുന്തോറും ഇത് കൂടിവരികയാണെന്നും ശ്രുതി പറയുന്നു. സംഭവത്തിൽ എഫ്‌ഐആർ രജിസ്റ്റർ ചെയ്ത് അന്വേഷണം ആരംഭിച്ചതായി പൊലീസ് പറഞ്ഞു. ഇത് സംബന്ധിച്ച്‌ കൂടുതൽ തെളിവുകൾ നടിയിൽ നിന്നും പൊലീസ് ആവശ്യപ്പെട്ടിട്ടുണ്ട്.