കുട്ടിയായിരുന്നപ്പോഴും, മുതിർന്നപ്പോഴും ആരും പറഞ്ഞിട്ടില്ല നിന്നെ കാണാൻ പെർഫക്‌ട് ആണെന്ന്- ടെസ ജോസഫ്

നിരവധി പരിപാടികളുടെ അവതാരകയും നടിയായും തിളങ്ങിയ താരമാണ് ടെസ ജോസഫ്. മമ്മൂട്ടി ചിത്രം പട്ടാളത്തിൽ പോസ്റ്റോഫീസ് ആർ.ഡി ഏജന്റ് വിമലയായിട്ടാണ് ടെസ എത്തിയത്. അനിൽ ജോസഫുമായി ടെസയുടെ വിവാഹം നടക്കുന്നത് 2005 ൽ ആണ്. ഇരുവർക്കും രണ്ടുമക്കൾ ആണുള്ളത്. കോട്ടയംകാരിയായ നടി പിന്നീട് ജീവിത തിരക്കുകളിലേക്ക് പോവുകയായിരുന്നു. കുടുംബസമേതം അബുദാബിയിലായിരുന്ന ടെസ വീണ്ടും അഭിനയത്തിലേക്ക് എത്തുന്ന വാർത്ത പ്രേക്ഷകർ ആകാംക്ഷയോടെയാണ് ഏറ്റെടുത്തത്

സോഷ്യൽ മീഡിയയിൽ സജീവമായ ടെസ്സ ഇപ്പോൾ പങ്കുവെച്ച ഒരു കുറിപ്പാണ് ശ്രദ്ധേയമാകുന്നത്. ബോഡി ഷെയ്മിങ് നേരിടേണ്ടി വന്ന അനുഭവമാണ് ടെസ്സ പങ്കുവെയ്ക്കുന്നത്. ഇതിനെതിരെ ശക്തമായ ഭാഷയിൽ ടെസ്സ പ്രതികരിക്കുകയും ചെയ്യുന്നുണ്ട്.

ടെസ്സയുടെ കുറിപ്പ് ഇങ്ങനെ

നിർത്തൂ എന്ന തലക്കെട്ടിനൊപ്പമാണ് ടെസ്സയുടെ കുറിപ്പ്.’കുട്ടിയായിരുന്നപ്പോഴും, മുതിർന്ന സ്ത്രീയായപ്പോഴും എന്നോട് ഒരിക്കലും ആരും പറഞ്ഞിട്ടില്ല, ‘നിന്നെ കാണാൻ പെർഫക്‌ട്’ ആണ് എന്ന്. അവരുടെ മുൻവിധിയോടെയുള്ള കണ്ണുകളിൽ ഞാനെപ്പോഴും തടിച്ചവളാണ്. അത് മുഖത്ത് നോക്കി പറയുന്നതിൽ അവർക്കാർക്കും യാതൊരു മടിയും ഉണ്ടായിരുന്നില്ല എന്നതും ശ്രദ്ധേയം.”നിങ്ങളുടെ ശരീരം എങ്ങിനെയായിരിയ്ക്കണം എന്നൊരു നിയമം സമൂഹം സെറ്റ് ചെയ്ത് വച്ചിട്ടുണ്ട്. മെലിഞ്ഞിരിക്കണം.. നിറമുണ്ടായിരിയ്ക്കണം നീണ്ടിരിക്കണം.. വളവുകൾ ഉണ്ടായിരിയ്ക്കണം.. സമൂഹത്തിന്റെ ഈ ഒരു കാഴ്ചപ്പാടിലൂടെ വിലയിരുത്തുമ്പോൾ ഭൂരിഭാഗം സ്ത്രീകളും ഞാൻ തടിച്ചിട്ടാണെന്ന് സ്വയം വിശ്വസിക്കുന്നു.’

‘മറ്റൊരു കാര്യം പ്രായമാവുന്നതാണ്. ഇത് രണ്ടും സ്വാഭാവികവും അനിവാര്യവുമാണ്. ഈ ഒരു സാമൂഹിക സാഹചര്യം പ്രായമാകുന്നത് ആഭികാമ്യമല്ലെന്ന് തെറ്റിദ്ധരിപ്പിക്കുകയും ചെറുപ്പമായി കാണാൻ ആളുകളെ പ്രോത്സാഹിപ്പിക്കുകയും ചെയ്യുന്നു. പ്രായാധിക്യത്തെ ചെറുക്കുകയും, ചെറുപ്പമായി കാണപ്പെടുകയും ചെയ്യുന്ന അഭിനേതാക്കളുടെയും മോഡലുകളുടെയും ചിത്രങ്ങൾ ഉപയോഗിച്ച്‌ ഇത് ശക്തിപ്പെടുത്തുന്നു. തീർച്ചയായും, അവരുടെ ചെറുപ്പത്തെ നിലനിർത്താൻ അവർ ഭീമമായ തുക ചെലവഴിച്ചിട്ടുണ്ടാവും. എന്നാൽ തന്റെ പ്രായം അംഗീകരിക്കുന്നത് ശരിയാണെന്ന് ഞാൻ കരുതുന്നു. അതുപോലെ തന്നെയാണ് സ്വാഭാവികമായി നിങ്ങളുടെ ശരീരത്തിനുണ്ടാവുന്ന മാറ്റങ്ങളും.’

ബോഡി ഷെയിമിങിന്റെയും എയ്ജ് ഷെയിമിങിന്റെയും പേരിൽ അവരുടെ ആത്മവിശ്വാസം നശിപ്പിയ്ക്കുന്നത് നിർത്തി, സമൂഹത്തെ ബോധവത്കരിക്കാം. എല്ലാത്തിനും ഉപരി നമ്മളെല്ലാം വികാരമുള്ള മനുഷ്യരാണ്.