കുട്ടിക്ക് ഭക്ഷണം കൊടുത്തു, കാര്‍ട്ടൂണ്‍ കാണിച്ചു, പോലീസിനൊപ്പം കേരളത്തിലെ ജനങ്ങള്‍ ഒറ്റക്കെട്ടായി പ്രവര്‍ത്തിച്ചുവെന്ന് എഡിജിപി

കൊല്ലം. അബിഗേല്‍ സാറയെ കണ്ടെത്താന്‍ പോലീസ് സേനയ്‌ക്കൊപ്പം കേരളത്തിലെ ജനങ്ങളും ഒറ്റക്കെട്ടായി ഇറങ്ങിയെന്ന് എഡിജിപി എംആര്‍ അജിത് കുമാര്‍. കുട്ടിയെ സുരക്ഷിതമായി തിരിച്ച് കിട്ടിയതാണ് വലിയ സന്തോഷം. പോലീസ് ഉദ്യോഗസ്ഥര്‍ക്കൊപ്പം സാധാരണക്കാരായ നാട്ടുകാരും പോലീസ് നടപടികള്‍ക്ക് പിന്തുണ നല്‍കിയെന്നും എഡിജിപി.

തെക്കന്‍ കേരളം മുഴുവനായും ശക്തമായ പരിശോധനയാണ് നടത്തിയത്. വാഹന പരിശോധനയ്‌ക്കൊപ്പം പ്രതികള്‍ ഒളിച്ചുതാമസിക്കാന്‍ സാധ്യതയുള്ള സ്ഥലങ്ങളിലും, ക്വാറികള്‍, റബര്‍ തോട്ടങ്ങള്‍, ഹോട്ടല്‍ എന്നിവടങ്ങളിലെല്ലാം ശക്തമായ പരിശോധന നടത്തി. എല്ലാ ബോര്‍ഡറും സീല്‍ ചെയ്തിരുന്നു. അതുകൊണ്ട് തന്നെ തങ്ങള്‍ക്ക് ഉറപ്പുണ്ടായിരുന്നു പ്രതികള്‍ കൊല്ലം ഭാഗം വിട്ട് പുറത്തേക്ക് പോകില്ലെന്ന്.

കുട്ടിയെ രാവിലെ തന്നെ കണ്ടെത്താം എന്നാണ് കരുതിയിരുന്നത്. അതേസമയം കുട്ടിയെ വണ്ടിക്കകത്ത് കയറ്റിയപ്പോള്‍ കുട്ടി കരയാന്‍ ശ്രമിച്ചു. അപ്പോള്‍ അവര്‍ വായ പൊത്തി. കുട്ടിയെ ബാക്ക് സീറ്റില്‍ കടത്തി. തുടര്‍ന്ന് ഒരു വീട്ടില്‍ എത്തിച്ച ശേഷം കുട്ടിയെ ഒരു മുറിയിലേക്ക് മാറ്റുകയും ഭക്ഷണം നല്‍കുകയും കാര്‍ട്ടൂണ്‍ കാണിക്കുകയും ചെയ്തു.

തുടര്‍ന്ന് രാവിലെ കുട്ടിയുമായി ചിന്നക്കടയില്‍ എത്തുകയും പിന്നീട് ഒരു ഓട്ടോയില്‍ കയറ്റി ആശ്രമം മൈതാനത്ത് ഇറക്കുകയുമായിരുന്നുവെന്ന് പോലീസ്. പ്രതികളെ അധികം താനസിക്കാതെ പിടികൂടാന്‍ സാധിക്കുമെന്നാണ് വിശ്വാസം. സംഭവത്തില്‍ കൂടുതല്‍ അന്വേഷണം നടത്തിവരുകയാണെന്നും എഡിജിപി.