പഠന ചിലവിനായി അമ്മയോടൊപ്പം ഹോട്ടലിൽ പൊറോട്ട അടിച്ച അനശ്വര ഹരി ഇനി അഭിഭാഷക

പഠന ചിലവിനായി അമ്മയോടൊപ്പം ഹോട്ടലിൽ പൊറോട്ട അടിച്ചതിനെ തുടർന്ന് സോഷ്യൽ മീഡിയയിൽ ശ്രദ്ധേയയായ എരുമേലി സ്വദേശിനി അനശ്വര ഹരി കേരള ഹൈക്കോടതിയിൽ നടന്ന ചടങ്ങിൽ അഭിഭാഷകയായി എൻറോൾ ചെയ്തു. ഞായറാഴ്ചയാണ് അനശ്വര എൻട്രോൾ ചെയ്തത്. അഭിഭാഷകയായെങ്കിലും ഹോട്ടലിൽ പൊറോട്ടയടിക്കുന്നത് തുടരുമെന്നും അനശ്വര പറഞ്ഞു.

14 വർഷം കൊണ്ട് പൊറോട്ടയടി തുടരുന്ന ഈ അഭിഭാഷക ക്രിമിനൽ വക്കീലായി അറിയപ്പെടാനാണ് ആഗ്രഹിക്കുന്നത്. തൊടുപുഴ അൽ അസർ കോളേജിൽ നിന്ന് നിയമ പഠനം പൂർത്തിയാക്കി. അപ്പോഴും അന്നമായ പൊറോട്ടയടിയെ തന്റെ ജീവതത്തോട് അനശ്വര ചേർത്തു പിടിച്ചു.

പണ്ട് സ്കൂളിൽ പോകുന്ന കാലം മുതൽ അനശ്വര പൊറോട്ടയടിക്കാൻ തുടങ്ങിയതാണ്. തുടർന്ന് കോളേജിൽ പോകുന്ന ദിവസമൊഴിച്ച് അവധി ദിവസങ്ങളിൽ അമ്മയ്ക്കൊപ്പം കൂടാറുണ്ടെന്ന് അനശ്വര പറയുന്നു. എറണാകുളത്ത് അഡ്വ. മനോജ് വി. ജോർജിന്റെ കീഴിൽ പ്രാക്ടീസ് ചെയ്യുവാൻ അനശ്വരയ്ക്ക് അവസരം കിട്ടി.

അഞ്ചാം ക്ലാസ് മുതൽ കാശാംകുറ്റിയിലെ ഹോട്ടലിൽ അനശ്വര പൊറോട്ടയടിക്കുന്നുണ്ട്. 20 വർഷമായി ഇവർ നടത്തുന്ന ഹോട്ടലിൽ ഇവരുടെ സഹായത്തിനായി അമ്മയുടെ സഹോദരിയുമുണ്ട്.