റാഗിങ്ങ് പരാതി, അലന്‍ ഷുഹൈബ് പൊലീസ് കസ്റ്റഡിയില്‍; എസ്എഫ്‌ഐ പകവീട്ടുന്നതായി അലന്‍

കണ്ണൂർ: പാലയാട് ക്യാമ്പസിൽ വിദ്യാർത്ഥികളെ റാഗ് ചെയ്‌തെന്ന പരാതിയിൽ പന്തീരാങ്കാവ് യു എ പി എ കേസിലെ പ്രതിയായ അലൻ ഷുഹൈബിനെ പൊലീസ് കസ്റ്റഡിയിലെടുത്തു. എസ് എഫ് ഐ പ്രവർത്തകനായ ഒന്നാം വർഷ എൽ എൽ ബി വിദ്യാർത്ഥി അദിൻ സുബിനെ മർദിച്ചെന്നാണ് അലനെതിരെ യുള്ള പരാതി. ധര്‍മ്മടം പൊലീസാണ് അലനെ ചോദ്യം ചെയ്യാനായി കസ്റ്റഡിയി ലെടുത്തത്. റാഗിങ് പരാതി നല്‍കി എസ് എഫ്‌ഐ പക വീട്ടുകയാണെന്ന് അലന്‍ ഷുഹൈബ് ആരോപിച്ചു.

കണ്ണൂര്‍ പാലയാട് ക്യാമ്പസില്‍ വെച്ച് അഥിന്‍ എന്ന ഒന്നാം വര്‍ഷ വിദ്യാര്‍ത്ഥിയെ അലന്‍ ഷുഹൈബിന്റെ നേതൃത്വത്തിലുള്ള സംഘം റാഗു ചെയ്തു എന്നാണ് എസ്എഫ്‌ഐ ആരോപിക്കുന്നത്. ഈ വിഷയത്തില്‍ ക്യാമ്പസില്‍ രാവിലെ മുതല്‍ സംഘര്‍ഷാവസ്ഥ നിലനിന്നിരുന്നു. രണ്ടു വിഭാഗം വിദ്യാര്‍ത്ഥികള്‍ തമ്മിലാണ് സംഘര്‍ഷാവസ്ഥ ഉടലെടുക്കുന്നത്.

അദിൻ തലശേരി സഹകരണ ആശുപത്രിയിൽ ചികിത്സയിലാണ്. എസ് എഫ് ഐക്കാരായ എൽ എൽ ബി വിദ്യാർത്ഥികളെ അലന്റെ നേതൃത്വത്തിലുള്ള സംഘം റാഗ് ചെയ്‌തെന്ന് ആരോപണമുണ്ടായ പിറകെയാണ് അലനെയും സംഘത്തെയും പൊലീസ് കസ്റ്റഡിയിലെടുത്തത്. പരാതി വ്യാജമാണെന്നാണ് അലന്റെ പ്രതികരണം.

കഴിഞ്ഞ വർഷം എസ് എഫ് ഐക്കാർ റാഗ് ചെയ്‌തെന്നും ഇതിനെതിരെ പ്രതികരിച്ചതിന് പകരം വീട്ടുകയാണ്. തന്റെ ജാമ്യം റദ്ദാക്കാനാണ് ശ്രമമെന്നും അലൻ ആരോപിച്ചു. 2019 നവംബർ ഒന്നിനായിരുന്നു മാവോയിസ്റ്റ് ബന്ധം ആരോപിച്ച് അലനെ പന്തീരാങ്കാവ് പൊലീസ് അറസ്റ്റ് ചെയ്തത്. പന്തീരാങ്കാവ് യുഎപിഎ കേസില്‍ ജയിലിലായിരുന്ന അലന്‍ ഷുഹൈബ് ജാമ്യത്തിലി റങ്ങിയിരുന്നു.