ചായക്കടയിൽ വിചിത്ര മോഷണം,ആദ്യ ദിനം അഞ്ച് പഴംപൊരി മോഷ്ടിച്ച കള്ളൻ രണ്ടാം ദിനം മോഷ്ടിച്ചത് പുട്ടും പരിപ്പുകറിയും

എറണാകുളം തുറവൂർ അരൂരിലെ വട്ടക്കേരി ക്ഷേത്രത്തിനു സമീപമുള്ള ജയകുമാറിന്റെ ചായക്കടയിൽ വിചിത്ര മോഷണം. ആദ്യ ദിനം കടയിൽ കയറിയ കള്ളൻ മോഷ്ടിച്ചത് അഞ്ചു പഴംപൊരിയാണെങ്കിൽ രണ്ടാം ദിനം മോഷ്ടിച്ചത് പുട്ടും പരിപ്പുകറിയുമാണ്.

കൊച്ചി: ചായക്കടയിൽ വിചിത്രമായ മോഷണം. ആദ്യ ദിനം കടയിൽ കയറിയ കള്ളൻ ‘മോഷ്ടിച്ചത്’ അഞ്ചു പഴംപൊരി! രണ്ടാം ദിനമാവട്ടെ കള്ളൻ ‘കൊണ്ടുപോയത്’ പുട്ടും പരിപ്പു കറിയും. ഇതുകൂടാതെ രണ്ടാം ദിവസം കുറച്ചു നാണയത്തുട്ടുകളും കള്ളൻ കൊണ്ടുപോയിട്ടുണ്ട്. ചായക്കടയുടെ പിന്നിലെ ഗ്രില്ലു പൊളിച്ചാണ് കള്ളൻ അകത്തു കയറിയിരിക്കുന്നത്.

വിശപ്പ് സഹിക്കാൻ കഴിയാത്തതുമൂലം ഭക്ഷണം മോഷ്ടിച്ചതാകാമെന്നാണ് പൊലീസ് നിഗമനം. ചായക്കടയുടെ ഏതാനും മീറ്റർ അകലെയുള്ള കുമർത്തുശേരിൽ സിയാദിന്റെ പലവ്യഞ്ജനക്കടയിൽ കയറാനുള്ള മോഷ്ടാവിന്റെ ശ്രമം വിഫലമായി. കടയുടെ പിന്നിലെ ഭിത്തി ഒരാൾക്കു കയറാൻ കഴിയുന്നവിധം തുരന്നെങ്കിലും ഭിത്തിയുടെ ഭാഗം കഴിഞ്ഞ് അകത്ത് തടസ്സങ്ങൾ ഉണ്ടായിരുന്നതിനാൽ കയറാനായില്ല. ഈ വിചിത്ര മോഷണക്കഥ നാട്ടുകാരെ ഒന്നടങ്കം അമ്പരപ്പിച്ചിരിക്കുകയാണ്.