പോക്‌സോ നിയമം പ്രാബല്യത്തിൽ വന്ന ദിനം, ശിശുദിനം, പോക്‌സോ കേസിൽ ആദ്യ വധശിക്ഷ, ഇരയ്ക്ക് 110-ാം നാൾ നീതി

എറണാകുളം : കുട്ടികളെ ലൈം​ഗികാതിക്രമങ്ങളിൽ സംരക്ഷിക്കുന്നതിനാണ് പോക്സോ നിയമം പ്രാബല്യത്തിൽ വന്നത്. 2012-ലെ ശിശുദിനത്തിലാണ് ഇന്ത്യൻ പീനൽ കോഡിലെ 1860 ഭേദഹ​ഗതി ചെയ്ത് POCSO- (Protection Children from Sexual Offences Act 2012) നിലവിൽ വരുന്നത്. 18 വയസിന് താഴെയുള്ള പെൺകുട്ടികൾക്കും ആൺകുട്ടികൾക്കും നേരെ നടക്കുന്ന ലൈം​ഗിക ചൂഷണങ്ങൾ തടയുകയാണ് ലക്ഷ്യം.

കേരളത്തിൽ പോക്സോ വകുപ്പ് ഉൾപ്പെട്ട കേസിൽ ആദ്യമായാണ് വധശിക്ഷയ്‌ക്ക് വിധിക്കുന്നത്. അഞ്ച് വയസുകാരിയെ ക്രൂരമായി ബലാത്സംഗം ചെയ്ത് മൃതദേഹം മാലിന്യക്കൂമ്പാരത്തിൽ വലിച്ചെറിഞ്ഞ പ്രതി അസ്ഫാക് ആലത്തിന് വധശിക്ഷ വിധിച്ച കോടതി ഉത്തരവിൽ കേരള ജനത തൃപ്തരാണ്. ഇത് തന്നെയായിരുന്നു ആ മനുഷ്യമൃഗത്തിന് കിട്ടേണ്ടിയിരുന്ന ശിക്ഷയും. ഇതിൽ കുറഞ്ഞതൊന്നും അവൻ അർഹിക്കുന്നില്ല.

കോടതി വിധിയിൽ ആലുവയിലെ ചുമട്ടുത്തൊഴിലാളികൾ മധുരം വിതരണം ചെയ്‌തു. പ്രതിയെ കണ്ടെത്താൻ പോലീസിന് നിർണായക തെളിവ് നൽകിയ ദൃക്‌സാക്ഷി താജുദ്ദീൻ മൊയ്തീന്റെ നേതൃത്വത്തിലായിരുന്നു ലഡു വിതരണം നടത്തിയത്.” ഇനി ഇത്തരം ക്രൂരതകൾ ആരും ചെയ്യരുത്. ഇന്ന് ഈ വിധിയിൽ ആ പിഞ്ചുകുഞ്ഞിന്റെ ആത്മാവ് വളരെ അധികം സന്തോഷിക്കുന്നുണ്ടാവും. കോടതിയോടും പബ്ലിക് പ്രൊസിക്യൂട്ടറോടും നന്ദി പറയുന്നു. ആ സംഭവത്തിന് ശേഷം ഇവിടെ ആര് വന്നാലും ശ്രദ്ധിക്കാറുണ്ട്”- താജുദ്ദീൻ പറഞ്ഞു.

എറണാകുളം പോക്‌സോ കോടതി ജഡ്ജി കെ. സോമനാണ് ശിക്ഷ വിധിച്ചത്. കുറ്റകൃത്യം നടന്ന് 110-ാം നാളിലാണ് ശിക്ഷ പ്രഖ്യാപിച്ചിരിക്കുന്നത്. അഞ്ചു വയസുകാരിയുടെ കൊലപാതകം അപൂർവങ്ങളിൽ അപൂർവമാണെന്നും പ്രതി ഒരു ദയവും അർഹിക്കുന്നില്ലെന്നും കോടതി അഭിപ്രായപ്പെട്ടു.