പ്രണയ സാഫല്യം, അമല പോൾ വീണ്ടും വിവാഹിതയായി

തെന്നിന്ത്യൻ താരം അമല പോൾ വീണ്ടും വിവാഹിതയായി. ഏറെക്കാലമായി പ്രണയത്തിലായിരുന്ന സംരംഭകനും കൺസൾട്ടന്റുമായ ജഗത് ദേശായിയാണ് വരൻ. കൊച്ചി ബോൾഗാട്ടി പാലസിൽ നിന്നുള്ള ചിത്രങ്ങൾ പങ്കുവച്ച് താരം തന്നെയാണ് ഇക്കാര്യം വെളിപ്പെടുത്തിയത്. ശേഷിക്കുന്ന ജീവിതത്തിലേക്ക് എന്റെ അപ്സരസിന്റെ കൈപിടിച്ച് മുന്നോട്ട്’, എന്നാണ് വിവാഹ ചിത്രം പങ്കുവെച്ചുകൊണ്ട് ജഗദ് ഇന്‍സ്റ്റഗ്രാമില്‍ കുറിച്ചിരിക്കുന്നത്. വിവാഹ ചിത്രത്തിന് താഴെ നിരവധി പേരാണ് ആശംസകളുമായി മുന്നോട്ട് വന്നിരിക്കുന്നത്. ലാവണ്ടർ നിറത്തിലുള്ള ലഹങ്കയും അതിന് ചേരുന്ന ചോക്കറും മോതിരവും കമ്മലുമാണ് വിവാഹ ചിത്രത്തില്‍ അമല ധരിച്ചിരുന്നത്. ലാവണ്ടറും ക്രീമും കലർന്ന ഷേർവാണിയായിരുന്നു വരന്‍ ജ​ഗത് ദേശായിയുടെ വേഷം.

അടുത്തിടെ ഇരുവരുടെയും വിവാഹ നിശ്ചയത്തിന്റെ ചിത്രങ്ങളും താരം പങ്കുവച്ചിരുന്നു. ‘മൈ ജിപ്സി ക്വീൻ യെസ് പറഞ്ഞു’ എന്ന അടിക്കുറിപ്പോടെ അമലയെ പ്രപ്പോസ് ചെയ്യുന്നതിന്റെ വീഡിയോ ജഗതും ഇൻസ്റ്റഗ്രാമിൽ പങ്കുവച്ചിരുന്നു.

സംവിധായകൻ എ.എൽ വിജയിയായിരുന്നു അമലയുടെ ആദ്യ ഭർത്താവ്. 2011ൽ വിജയ് സംവിധാനം ചെയ്ത് അമല പോൾ അഭിനയിച്ച ദൈവ തിരുമകൾ എന്ന സിനിമയുടെ ലൊക്കേഷനിൽ വച്ചായിരുന്നു ഇരുവരും അടുപ്പത്തിലായത്. അത് പിന്നീട് പ്രണയത്തിലേക്ക് എത്തി. 2014 ൽ അമലയും വിജയും വിവാഹതിരായി. ഹിന്ദു – ക്രിസ്ത്യൻ ആചാരപ്രകാരമായിരുന്നു വിവാഹം. രണ്ട് വർഷം മാത്രം മുന്നോട്ട് പോയ ഇരുവരും 2016ൽ വേർപിരിയൽ പ്രഖ്യാപിച്ചു. 2017ലാണ് നിയമപരമായി ബന്ധം അവസാനിപ്പിച്ചത്.