അധിക്ഷേപ ട്രോളിനെതിരെ അമേയ, ഒടുവില്‍ മാപ്പ് പറഞ്ഞ് ഗ്രൂപ്പ് അഡ്മിന്‍

മലയാളികളുടെ പ്രിയപ്പെട്ട നടിമാരില്‍ ഒരാളാണ് അമേയ മാത്യു. സിനിമകള്‍ക്ക് പുറമെ വെബ് സീരീസുകളിലൂടെയും താരം ശ്രദ്ധനേടി. സോഷ്യല്‍ മീഡിയകളില്‍ ഏറെ സജീവമാണ് നടി. ചിത്രങ്ങള്‍ക്ക് ഒപ്പം അമേയ നല്‍കുന്ന ക്യാപ്ഷനുകള്‍ വന്‍# ഹിറ്റാണ്. ചിത്രങ്ങള്‍ക്കായി ക്യാപ്ഷന്‍ കണ്ടെത്തുകയല്ല ക്യാപ്ഷനിടാന്‍ വേണ്ടി ചിത്രങ്ങളെടുക്കുകയാണെന്ന് അമേയയെ കുറിച്ച് സോഷ്യല്‍ മീഡിയ പറയാറുണ്ട്. കഴിഞ്ഞ ഇടയ്ക്ക് പുറത്തിറങ്ങിയ മമ്മൂട്ടി ചിത്രമായ ദ പ്രീസ്റ്റിലും അമേയ അഭിനയിച്ചിരുന്നു.

ഇപ്പോഴിതാ തന്നെ പരിഹസിക്കുന്നൊരു ട്രോളിനെതിരെ പ്രതികരിച്ചു കൊണ്ട് രംഗത്ത് എത്തി കൈയ്യടി നേടിയിരിക്കുകയാണ് അമേയ. ഫേസ്ബുക്ക് ഗ്രൂപ്പില്‍ പങ്കുവച്ചൊരു പോസ്റ്റിനെതിരെയായിരുന്നു അമേയ രംഗത്ത് എത്തിയത്. ദ പ്രീസ്റ്റിലെ അമേയയുടെ വേഷത്തെയായിരുന്നു ട്രോളിയത്. സര്‍ എന്താണ് എന്റെ റോള്‍ എന്ന് അമേയ ചോദിക്കുമ്പോള്‍ ഒരു ഡയലോഗിന് ഒരു ക്യാരക്ടര്‍ പോസ്റ്റര്‍ എന്ന് സംവിധായകന്‍ മറുപടി നല്‍കുന്നതാണ് ട്രോള്‍. ക്യാരക്ടര്‍ പോസ്റ്ററും പങ്കുവച്ചിരുന്നു.

ഇതിനെതിരെ അമേയ രംഗത്ത് എത്തുകയായിരുന്നു. അംഗീകാരത്തിന് നന്ദി. പ്രീസ്റ്റിന്റെ ഭാഗമാകാന്‍ സാധിച്ചതില്‍ എനിക്ക് സന്തോഷമുണ്ട്. എനിക്ക് ലഭിച്ച റോള്‍ ചെറുതായാലും വലുതായാലും. കമന്റ്‌സില്‍ ചില സൈബര്‍ ബുള്ളിമാര്‍ എന്നെ പിന്തുടരുന്നതായി മനസിലായിട്ടുണ്ട്. എസ്എംഎംഡിയുടെ അഡ്മിന്‍ ഇതുപോലുള്ള സൈബര്‍ ബുള്ളിയിംഗും മിസോജിനിസ്റ്റിക് കമന്റ്‌സും പ്രോത്സാഹിപ്പിക്കുന്നുവെന്നത് അത്ഭുതമാണ്. – അമേയ പ്രതികരിച്ചു.

ഇതിന് പിന്നാലെ ഫേസ്ബുക്ക് ഗ്രൂപ്പ് അമേയയോട് മാപ്പ് പറഞ്ഞ് രംഗത്തെത്തി. ഇത്തരത്തിലുള്ള സംഭവങ്ങള്‍ ആവര്‍ത്തിക്കില്ലെന്ന് അവര്‍ മറുപടി നല്‍കി. മാത്രമല്ല പരസ്യമായി മാപ്പു ചോദിച്ചു. മാപ്പ് ചോദിച്ച നടപടിയെ അംഗീകരിക്കുന്നതായി അമേയ പറഞ്ഞു. പക്ഷെ ഇത്തരത്തിലുള്ള അപമാനിക്കലുകളിലൂടെ കടന്നു പോയ ആദ്യത്തെയാളല്ല താനെന്നും ഭാവിയില്‍ കരുതല്‍ വേണമെന്നും അമേയ പറഞ്ഞു.