ആ സിനിമയില്‍ ശരിക്കും ചേട്ടന്‍ ബാവ ആകേണ്ടിയിരുന്നത് തിലകനായിരുന്നുവെന്ന് റാഫി

റാഫി മെക്കാര്‍ട്ടിന്‍ തിരക്കഥ ഒരുക്കി രാജസേനന്‍ സംവിധാനം ചെയ്ത അനിയന്‍ ബാവ ചേട്ടന്‍ ബാവ എന്ന ചിത്രത്തില്‍ ശരിക്കും ചേട്ടന്‍ബാവയുടെ വേഷം ചെയ്യേണ്ടിയിരുന്നത് നടന്‍ തിലകനായിരുന്നുവെന്ന് തിരക്കഥാകൃത്ത് റാഫി. എന്നാല്‍ പിന്നീട് സംവിധായകന്റെ നിര്‍ദ്ദേശപ്രകാരമാണ് തിലകനെ വേണ്ടെന്ന് തീരുമാനിച്ചത്. പിന്നീട് ആ വേഷത്തിലേക്ക് നരേന്ദരപ്രസാദിനെ പരിഗണിക്കുകയായിരുന്നുവെന്നും റാഫി പറഞ്ഞു. വില്ലന്‍ വേഷങ്ങള്‍ ചെയ്തുകൊണ്ടിരുന്ന നരേന്ദ്രപ്രസാദും രാജന്‍ പി ദേവും കോമഡി-ഇമോഷണല്‍ വേഷങ്ങളിലേക്ക് ചുവടുമാറ്റം നടത്തിയത് ഈ ചിത്രത്തിലൂടെയാണ്.

‘എഴുതുമ്പോള്‍ ഞങ്ങളുടെ മനസില്‍ അനിയന്‍ ബാവ രാജന്‍പി ദേവും ചേട്ടന്‍ ബാവ തിലകനുമായിരുന്നു. കാട്ടുകുതിര എന്ന സിനിമയില്‍ തിലകന്‍ ചേട്ടന്‍ അവതരിപ്പിക്കുന്ന കൊച്ചുവാവയുമായി ചേട്ടന്‍ ബാവയ്ക്ക് സാമ്യം വരുമോ എന്ന് രാജസേനന്‍ സാറിന് ഒരു സംശയം. അദ്ദേഹം പറഞ്ഞു, ചേട്ടന്‍ ബാവ നരേന്ദ്ര പ്രസാദ് മതി. പ്രസാദ് സാര്‍ കൂടുതലും വില്ലന്‍-ബുദ്ധിജീവി റോളുകള്‍ ചെയ്ത് കൊണ്ടിരുന്ന കാലമാണ്.

ഇതുപോലൊരു കോമഡി കുപ്പായം അദ്ദേഹത്തിന് ചേരുമോ എന്ന് ഞങ്ങള്‍ക്കൊരു ആശങ്ക ഉണ്ടായിരുന്നു. പക്ഷേ സംവിധായകന്റെ മനസില്‍ ഒരു സിനിമ തെളിഞ്ഞിട്ടുണ്ടാകുമല്ലോ. അദ്ദേഹം പറഞ്ഞു. ആ റോള്‍ പ്രസാദ് സാര്‍ ചെയ്താല്‍ നന്നായിരിക്കും. അതിനൊരു പുതുമ ഉണ്ടാകുമെന്നും. അങ്ങനെയാണ് നരേന്ദ്ര പ്രസാദ് ആ വേഷം ചെയ്യുന്നത്. റാഫി പറഞ്ഞു.