പതിമൂന്നാം വയസ്സിൽ അമ്മയെ നഷ്ടമായി, അമ്മയെ പോയി കെട്ടിപിടിക്കാനോ ഉമ്മ വയ്ക്കാനോ, സംസാരിക്കാനോ, സോറി പറയാനോ ഒന്നും സാധിച്ചിട്ടില്ല- ആനി

ബാലചന്ദ്രമേനോൻ ഒരുക്കിയ അമ്മയാണേ സത്യം എന്ന ചിത്രത്തിലൂടെ അഭിനയ രംഗത്ത് എത്തിയ നടിയാണ് ആനി. നിരവധി ചിത്രങ്ങളിൽ താരം നായികയായി എത്തി. വളരെ കുറച്ച് കാലം മാത്രമാണ് ആനി സിനിമലോകത്ത് ഉണ്ടായിരുന്നതെങ്കിലും മലയാള സിനിമയിൽ തന്റേതായ വ്യക്തിമുദ്ര പതിപ്പിക്കാൻ താരത്തിന് കഴിഞ്ഞിരുന്നു.

മമ്മൂട്ടിയുടെ നായികയായി നടി അഭിനയിച്ച മഴയത്തും മുൻപേ ആനിയ്ക്ക് നിറയെ പ്രേക്ഷകപ്രീതി നേടികൊടുത്ത ചിത്രമാണ്. ചിത്രത്തിൽ നെഗറ്റീവ് ക്യാരക്ടർ ആയും, നായികാ പ്രാധാന്യമുള്ള ക്യാരക്ടർ ആയും തിളങ്ങാൻ ആനിയ്ക്ക് സാധിച്ചിരുന്നു. സിനിമയിൽ തിളങ്ങി നിൽക്കവെയായിരുന്നു സംവിധായകൻ ഷാജജി കൈലാസുമായി ആനി പ്രണയത്തിലാകുന്നതും പിന്നീട് വിവാഹം നടക്കുന്നതും. വിവാഹ ശേഷം അഭിനയത്തിൽ നിന്നും മാറി നിൽക്കുകയാണ് നടി.

2023 ലെ ഏറ്റവും വലിയ സങ്കടം അമ്മായി അമ്മയുടെ വേർപാട് ആയിരുന്നെന്ന് പറയുകയാണ് ആനി. എന്റെ അനീസ് കിച്ചണിന്റെ ഏറ്റവും വലിയ ആരാധിക അമ്മ ആയിരുന്നു. ഇന്ന് അമ്മയില്ല.എനിക്ക് ഒരു സുഹൃത്ത് ആയിരുന്നു, എനിക്ക് വേണ്ടുന്നത് എല്ലാം പറഞ്ഞുതരുമായിരുന്നു അമ്മ. ആ വേർപാട് വലിയ നഷ്ടം തന്നെയാണ്- ആനി അമ്മയും മകളും വേദിയിൽ പറയുന്നു.

അമ്മ എന്ന് പറയുന്ന രണ്ടക്ഷരം ഞാൻ എൻറെ ജീവിതത്തിൽ ഒരുപാട് മിസ് ചെയ്തിട്ടുണ്ട്. എനിക്ക് പതിമൂന്നുവയസ്സുള്ളപ്പോഴാണ് അമ്മയുടെ മരണം. ശരിക്കും അമ്മയുടെ ഒപ്പമുള്ള നല്ല നിമിഷങ്ങൾ ഒന്നും തന്നെ ഇല്ല. എന്റെ അമ്മയെ പോയി കെട്ടിപിടിക്കാനോ ഉമ്മ വയ്ക്കാനോ, സംസാരിക്കാനോ, സോറി പറയാനോ ഒന്നും സാധിച്ചിട്ടില്ല.അതൊക്കെ ഒരുപാട് മിസ് ചെയ്തിട്ടുണ്ട്. ഇനിയും അത് സാധിക്കില്ല എന്ന് അറിയാം. പക്ഷേ ഞാൻ എപ്പോഴും ദൈവത്തോട് പ്രാർത്ഥിക്കും എല്ലാ അമ്മ മകൾക്കും നല്ലൊരു ബന്ധം പരസ്പരം ഉണ്ടാകണം എന്ന്, നമ്മുടെ അവസാന ശ്വാസം വരെ അമ്മ നമ്മുടെ കൂടെ വേണ്ടതാണ്.

അമ്മയില്ലാതെ ഉള്ള എന്റെ ജീവിതത്തിൽ ആ വിടവ് നികത്താൻ ആർക്കും സാധിച്ചിട്ടില്ല. അമ്മയുടെ വേർപാട് അറിഞ്ഞിട്ടുള്ള എല്ലാവർക്കും ആ വേദന മനസിലാകും. എന്റെ അമ്മയോട് ഒരുപാട് സംസാരിക്കണം എന്നൊക്കെ ഞാൻ ആഗ്രഹിച്ചിട്ടുണ്ട്. അത് നടന്നിട്ടില്ല. ഞാൻ ഒരു നല്ല അമ്മയായി നിൽക്കുന്നത് കാണാൻ എന്റെ അമ്മയും ആഗ്രഹിച്ചിട്ടുണ്ട്. എനിക്ക് അറിയാം.

എന്റെ വിഷമം കുറച്ചെങ്കിലും മാറുന്നത് ഏട്ടന്റെ അമ്മയെ കിട്ടിയപ്പോഴാണ്. എന്റെ മൂന്നു പിളേളരുടെ പ്രസവവത്തിനും എന്റെ കൂടെ എല്ലാ കാര്യത്തിനും അമ്മയാണ് നിന്നത്. അമ്മ എന്ന വാക്ക് ആര് പറഞ്ഞാലും അത് ഇമോഷണലി ഫീൽ ആകും. അമ്മയെ കാണാനും സംസാരിക്കാനും ഒക്കെ എനിക്ക് മിസ് ചെയ്യുന്നുണ്ട്. ഒരിക്കലും ഒരു കുഞ്ഞും ആ വേദന അറിയരുത്