അൽ-ഖ്വായ്ദ തീവ്രവാദികൾക്ക് താമസമൊരുക്കിയ ഒരു മദ്രസ കൂടി അസമിൽ ഇടിച്ചു നിരത്തി.

ഗുവാഹട്ടി. ഇസ്ലാമിക ഭീകര സംഘടന അൽ-ഖ്വായ്ദയുമായി ബന്ധമുണ്ടെന്ന് കണ്ടെത്തിയതിനെ തുടർന്ന് അസമിലെ ഒരു മദ്രസ കൂടി ജെ സി ബി കൊണ്ട് ഇടിച്ചു നിരത്തി. അസമിലെ ബാർപേട്ട ജില്ലയിലെ മദ്രസയാണ് അധികൃതർ ഇടിച്ചു നിരത്തിയത്. മദ്രസയിലെ പ്രധാന അദ്ധ്യാപകനായ മഹ്മൂനുർ റഷീദിനെ പോലീസ് അറസ്റ്റ് ചെയ്തിട്ടുണ്ട്.

ബാർപേട്ടയിലെ ധകലിയാപാറയിലെ മദ്രസയിൽ ജിഹാദി പ്രവർത്തനങ്ങൾ നടന്ന് വരുകയായിരുന്നു. ഇതിനാൽ നിയമപരമായ എല്ലാ നടപടിക്രമങ്ങളും പാലിച്ച് മദ്രസ പൊളിച്ചു നീക്കുകയാണെന്ന് അസം മുഖ്യമന്ത്രി ഹിമന്ത ബിശ്വ ശർമ്മ വ്യക്തമാക്കിയതിനു പിറകെയായിരുന്നു ഇടിച്ചു നിരത്തൽ നടന്നത്.

അൽ-ഖ്വായ്ദ ഭീകരരായ ബംഗ്ലാദേശി പൗരന്മാർക്ക് താമസ സൗകര്യം ഒരുക്കിയതിനാണ് ശൈഖുൽ ഹിന്ദ് മഹ്മൂദുൽ ഹസൻ ജമിയുൾ ഹുദാ ഇസ്ലാമിക് അക്കാഡമി എന്ന മദ്രസ സർക്കാർ ഇടിച്ചു നിരത്തിയത്. മദ്രസയിൽ ഒളിച്ചു താമസിച്ച രണ്ട് ബംഗ്ലാദേശി ഭീകരരിൽ സൈഫുൾ ഇസ്ലാം എന്നയാളെ പിന്നീട് പോലീസ് അറസ്റ്റ് ചെയ്യുകയായിരുന്നു. അൽ-ഖ്വായ്ദ ബന്ധം കണ്ടെത്തിയതിനെ തുടർന്ന് ഓഗസ്റ്റ് 4ന് അസമിലെ മോറിഗാവ് ജില്ലയിലെ ഒരു മദ്രസ നേരത്തെ ഇടിച്ചു നിരത്തിയിരുന്നു. ഇതിന്റെ നടത്തിപ്പുകാരനും അറസ്റ്റിലായിരുന്നു.