ശ്രീനിവാസൻ വധക്കേസിൽ മറ്റൊരു പിഎഫ്‌ഐ അംഗം കൂടി എൻഐഎയുടെ പിടിയിലായി, പാലക്കാട്ടെ ബന്ധുവീട്ടിൽ പ്രതികൾ

പാലക്കാട് . പാലക്കാട് . ആർഎസ്എസ് നേതാവ് എ ശ്രീനിവാസനെ കൊലപ്പെടുത്തിയ കേസിൽ പ്രതിയായ ഒരു പി എഫ് ഐ പ്രവർത്തകൻ കൂടി എൻ ഐ എ യുടെ പിടിയിലായി. പ്രതിയായ സഹീർ കെവി കുറ്റകൃത്യത്തിന് ശേഷം ഇതുവരെ ഒളിവിലായിരുന്നു. ഇയാളെ പിടികൂടുന്നതിനായി ഒരു ലക്ഷം രൂപ എൻ ഐ എ പാരിതോഷികം പ്രഖ്യാപിച്ചിരുന്നു.

ശ്രീനിവാസൻ കൊലപാതക കേസിൽ 44 പ്രതികളാണ് ഉള്ളത്. 18 പ്രതികൾക്കെതിരായി 1950 പേജുകളുള്ള കുറ്റപത്രമാണ് ഇറക്കിയിട്ടുള്ളത്. ഇതിൽ 185 കക്ഷികളും ഡിജിറ്റൽ തെളിവുകൾ ഉൾപ്പെടെ 270 തൊണ്ടിമുതലുകളും ഉൾപ്പെടുന്നുണ്ട്. രാഷ്‌ട്രീയപകയിലാണ് ശ്രീനിവാസനെ കൊലപ്പെടുത്തുന്നത്.

2022 ഏപ്രിൽ 16-ന് ഉച്ചയ്‌ക്ക് ഒരു മണിയോടെ ആണ് കൊലപാതകം നടക്കുന്നത്. മൂന്ന് ബൈക്കുകളിലായി എത്തിയ സംഘം മേലാമുറിയിലെ എസ്‌കെഎസ് ഓട്ടോസ് എന്ന സ്ഥാപനത്തിൽ അതിക്രമിച്ച് കയറി ശ്രീനിവാസനെ വെട്ടി കൊലപ്പെടുത്തു കയായിരുന്നു.

എൻഐഎ ഫ്യുജിറ്റീവ് ട്രാക്കിംഗ് ടീം (എഫ്ടിടി) പാലക്കാട് ജില്ലയിലെ ഒരു ബന്ധുവീട്ടിൽ നിന്ന് ഇയാളെ പിന്തുടർന്ന് അറസ്റ്റ് ചെയ്യുകയായിരുന്നു. പാലക്കാട് ജില്ലക്കാരനായ സഹീർ ലക്ഷ്യമിട്ട കൊലപാതകം നടത്തിയ പിഎഫ്‌ഐ അസാൾട്ട് ആൻഡ് പ്രൊട്ടക്ഷൻ ടീമിന്റെ ഭാഗമായിരുന്നു. ശ്രീനിവാസന്റെ പ്രധാന അക്രമികൾക്ക് സംരക്ഷണം നൽകുന്ന ചുമതലയും സഹീറിനായിരുന്നു.

ഒരു പ്രത്യേക സമുദായത്തിൽപ്പെട്ടവർക്കിടയിൽ ഭീകരത സൃഷ്ടിച്ച് ഇസ്‌ലാമിക ഭരണം സ്ഥാപിക്കാനുള്ള നിരോധിത സംഘടനയുടെ വലിയ പദ്ധതിയുടെ ഭാഗമായി ശ്രീനിവാസനെ ഇല്ലാതാക്കാൻ പിഎഫ്‌ഐ നേതാക്കളുടെ വിവിധ ഗൂഢാലോചനകളിൽ പിഎഫ്‌ഐയുടെ പട്ടാമ്പി ഏരിയ പ്രസിഡന്റായിരുന്ന പ്രതിക്ക് പങ്കുള്ളതായി എൻഐഎ അന്വേഷണത്തിൽ തെളിഞ്ഞു. 2047-ഓടെ ഇന്ത്യയെ ഇസ്‌ലാമിക രാജ്യമാക്കുകയായിരുന്നു ഇവരുടെ ലക്‌ഷ്യം.